Иҫкәрмәләр бөтһә генә, хаҡы түләнә

Башҡортостан Республикаһы Башлығы Радий Хәбировтың шәхси башланғысы менән 2019 йылдан алып республикала күп фатирлы йорттарҙың подъездарына комплекслы ремонт үткәрелә. Ошо осорҙа Башҡортостанда 8 171 подъезд ремонтланды. Эште башлар алдынан Төбәк операторы тәғәйен йортта йәшәгәндәр менән осрашыу уҙғара. Унда ремонт эштәренең составы, стеналарҙы биҙәкләү төрө һәм төҫө һайлап алына. Комплекслы ремонт барышында төҙөүселәргә түбәндәге эште башҡарыу бурысы ҡуйыла: – подъезға инеү урынын тәртипкә килтереү; – стена һәм түшәмде буяу; – ағас тәҙрә һәм ишек блоктарын пластикка алмаштырыу; – тышҡыһынан тыш тамбур ишеге ҡуйыла; – беренсе ҡатта керамик плитә түшәлә; – һылау һәм буяу эштәре башҡарыла; – энергияны һаҡсыл тотонған яҡтыртҡыстар, почта йәшниктәре эленә, электр сымдары стеналарҙан алына һәм махсус ҡумталарға индерелә, баҫҡыстан менгәндә тотонғостар яңыртыла. Программаға ярашлы, подъезға ингән урында хәрәкәте сикләнгән кешеләр өсөн пандустар урынлаштырыу ҙа ҡаралған. Улар инвалидтар өсөн генә түгел, ә балалар коляскаһы йөрөткән атай-әсәйҙәр, оло йәштәгеләр өсөн дә ҡулайлы булырға тейеш. Билдәле булыуынса, Башҡортостан – Бәләкәй ҡалаларҙа һәм тарихи ҡасабаларҙа уңайлы ҡала мөхите булдырыу буйынса Бөтә Рәсәй конкурсында әүҙем ҡатнашыусы. Ошо бәйгелә республиканан 29 проект еңеүсе тип табылды. Был – Рәсәй төбәктәре араһында өсөнсө урын. Шуныһы мөһим: конкурста Башҡортостандың бөтә бәләкәй ҡалалары ла ҡатнашты һәм еңеүсе булды, шуларҙың һигеҙе – икешәр тапҡыр. Радий ХӘБИРОВ, Башҡортостан Республикаһы Башлығы: – Подъездарҙы комплекслы ремонтлар алдынан беҙҙең төп шарт шул ине: был күп ҡатлы йорттарҙа йәшәгәндәр, матди яҡтан сығымдар талап ителмәһә лә, ошо эштә ҡатнашырға тейеш. Уларҙан ике генә нәмә талап ителде: беренсенән, улар үҙ подъезын, ихатаһын, йортон ниндәй төҫтә һәм дизайнда күрергә теләй, икенсенән, ремонт тамамланғас та үҙҙәренең был яңырған мөлкәтенә һаҡсыл ҡарашта булыу. Беҙ был эш төрҙәрен бөтә райондарға таратырға тырышабыҙ. Матурайған подъездарға һәм йорттоң күркәмлегенә һуңынан барыһы ла һоҡлана. Улар, ирекһеҙҙән тигәндәй, элеккеһе менән яңы күренеште сағыштырып ҡарай бит. Етмәһә, эш барышын бында йәшәгән халыҡ үҙе контролдә тота. Күп фатирлы йорттағы милекселәр әйткән бөтә иҫкәрмәләр ҙә төҙәтелгәс кенә подрядсы ойошманың эшен ҡабул итеү буйынса актҡа ҡул ҡуйыла һәм ремонт хаҡы түләнә. ФЕКЕР Павел САФОНОВ, “Башҡортостан Республикаһының төбәк операторы” фондының генераль директоры: – Өфөнөң коммуналь хужалыҡ белгестәре үткәргән тикшеренеүҙәр күрһәтеүенсә, подъездарҙы ремонтлағанда тәҙрәләрҙе алмаштырыу һәм тамбур ишектәре ҡуйыу йылылыҡты кәмендә биш процентҡа экономиялау мөмкинлеге бирә, ә ҡайһы бер йорттарҙа был күрһәткестең 15 процентҡа етеүе лә бар. Ремонт барышындағы артабанғы мөһим аҙым – стеналарҙы һылау һәм буяу. Элегерәк подъезд стенаһында ваҡ кителгән урындарҙы бөтөргәс тә зәңгәр йәки йәшел төҫтәге ғәҙәттәге маляр буяуы менән аҡлап сығалар ине, уның көслө еҫе таралғансы подъезда йәшәгәндәр бер нисә көн түҙергә мәжбүр булды. Хәҙер яңы технология ҡулланыла. Стеналарҙы буяу өсөн майлы түгел, ә һыуға сыҙамлы махсус декоратив штукатурка файҙаланалар. Автор фотоһы.