Ташҡын хәрәкәтте туҡтата алмаясаҡ

Туҡтауһыҙ барған яуым-төшөм арҡаһында Башҡортостанда бөгөнгә 22 километр юл, 24 күпер һәм өс һыу ағыҙыу торбаһы һыу баҫыуҙан зыян күрҙе. Бәлә-ҡазаның күләме айырыуса Әбйәлил, Баймаҡ, Белорет, Бөрйән, Йылайыр, Йәрмәкәй, Салауат һәм Учалы райондарында ҙур. Был ғәрәсәт эҙемтәләрен бөтөрөү өсөн республикала ниндәй саралар күрелә? Башҡортостандың Транспорт һәм юл хужалығы министрлығы хәбәр итеүенсә, әлеге мәлдә һыу ингән ауылдарға урау юлдарҙан барыу мөмкинлеге булдырылған, зыян күргән төбәк һәм муниципаль әһәмиәттәге юлдарҙың 17,5 километрында автомобилдә үтергә була. Шуныһы мөһим: министрлыҡ ошо юлдарҙы норматив хәлгә килтереү өсөн өҫтәмә аҡса бүлеүҙе планлаштыра. “Бының өсөн республиканың юл селтәренә тәбиғәт килтергән зыянды иҫәпләргә кәрәк, яҡынса иҫәп-хисап буйынса ул 67 миллион һум самаһына барып баҫа. Әлеге ваҡытта муниципалитеттар менән берлектә тәүге сираттағы һәм яҡын киләсәктә башҡарылырға тейешле эш күләмен аныҡлайбыҙ”, тиҙәр Транспорт һәм юл хужалығы министрлығында. Үткән аҙнала яуым-төшөм туҡтаманы һәм һыу баҫҡан майҙандар арта төштө. Әбйәлил районының Күл ауылындағы Йәштәр һәм Мәктәп урамдары, мәҫәлән, тотошлай һыу аҫтында ҡалды. Ғәҙәттән тыш хәлдәр министрлығының матбуғат хеҙмәте белдереүенсә, унда оператив төркөм эшләй. “Халыҡҡа эвакуация талап ителгәндә ҡайҙа барырға кәрәклеге аңлатылды, бындай осраҡ өсөн кешеләрҙе Урал аръяғы аграр сәнәғәт колледжы ятағында урынлаштырыу ҡаралды, биш автобус әҙерләнде. Әлегә халыҡ эвакуациянан баш тарта”, – тиҙәр министрлыҡта. Бөгөнгә ошо урамдарҙа бер экскаватор, ике “МАЗ” һәм ике “КамАЗ” эшләй, һыу йыуҙырған урындарҙа юлдың өҫтө күтәртелә, һыу аҡрынлап ҡайта башлаған. – Беҙҙең төбәктә бер-ике көн эсендә айлыҡ норманың 300 проценты самаһы яуҙы. Ун өс биләмәне контролдә тоттоҡ. Урындағы әһәмиткә эйә булған юлдарыбыҙҙы үҙ көсөбөҙ менән аяҡҡа баҫтыра аласаҡбыҙ. Юл хужалығы идаралығы балансында иҫәпләнгән бер нисә юлды элеке хәленә ҡайтарыу өсөн Башҡортостан Башлығы Радий Хәбировтан ярҙам һораныҡ, ул вәғәҙә итте һәм ярҙам оҙаҡ көттөрмәне лә – был әйтелгән авариялы урындарҙа әле эш ҡайнай, – ти Белорет районы хакимиәте башлығы Андрей Иванюта. – Көслө яуын арҡаһында беҙҙә һигеҙ күпер зыян күрҙе. Уларҙы тәртипкә килтереү байтаҡ сығымдар талап итәсәк. Баймаҡ районында бер күперҙе яуын ағыҙып алып киткән, икенсеһе һыу аҫтында ҡалған. Һөҙөмтәлә 200 кеше тышҡы донъя менән юл бәйләнешенән мәхрүм. Урындағы халыҡ әйтеүенсә, Яйыҡ йылғаһы аша һалынған ошо күперҙәрҙе муниципалитет көсө менән йыл һайын тип әйтерлек ремонтлайҙар, әммә был серек ҡоролмалар оҙаҡҡа түҙмәй, яҙ етеү менән тағы емерелә. Һөҙөмтәлә йылға аръяғында айырылып ҡалған ауылдарға яуым-төшөм көслө булған яҙғы-көҙгө миҙгелдәрҙә аҙыҡ-түлек һәм почта килтерә алмайҙар. Дауаханаға барыу өсөн йылға аша кәмә менән сығырға тура килә. Башҡортостандың Ғәҙәттән тыш хәлдәр буйынса дәүләт комитеты белдереүенсә, көслө яуын йыуған юлдарҙы тейешле хәлгә килтереү эше республиканың дүрт төбәгендә – Баймаҡ, Белорет, Бөрйән һәм Салауат райондарында – тамамланған. Шулай уҡ Бөрйән районында Һарғайы ауылынан алып Иҫке Собханғол – Ҡағы трассаһына саҡлы булған юл йөрөрлөк хәлгә килтерелде. Дәүләт комитеты мәғлүмәттәренән күренеүенсә, Учалы районында юл инфраструктураһын тергеҙеү яуым-төшөм буйынса хәл бер аҙ тотороҡланғас башланасаҡ. Ә республиканың Транспорт һәм юл хужалығы министрлығы аша белеүебеҙсә, Стәрлетамаҡ ҡалаһында һәм районында өс автомобиль юлы һыу эсендә ятыуын дауам итә. Кирилл ПЕРВОВ, Башҡортостан Республикаһының Ғәҙәттән тыш хәлдәр буйынса дәүләт комитеты рәйесе: – Хәтерегеҙгә төшөрәбеҙ: 26 июлдә Баймаҡ районында Сибай – Төйәләҫ автомобиль юлы йыуылғайны. Бөгөнгә унда юлды тәртипкә килтереү эше тамамланды. Ошо уҡ көндө Стәрлетамаҡ – Белорет – Магнитогорск юлының 140-сы километрында ғәрәсәтле ямғыр юл һыҙатын йыуҙырҙы. 27 июлдә Бөрйән районында Һарғайы ауылынан алып Иҫке Собханғол – Ҡағы трассаһына тиклемге юлда ике урында ҡойон юлды емерҙе. Әлеге мәлгә был урында ла йыуҙырылған ер элекке хәленә ҡайтарылды. 27 июлдә Салауат районында Мишәгәр – Торналы – Мөрсәлим юлында Һикеяҙ йылғаһы аша һалынған ваҡытлыса күперҙе йыуҙырғайны, бында ваҡытлыса күпер өҫтөнә ер һәм ҡырсынташ түшәлде. Фото: “Башинформ”.