Фән - илдең үҫеш нигеҙе

Бөгөн Башҡортостан Башлығы Радий Хәбиров видеобәйләнеш аша Волга буйы федераль округы Советы ултырышында ҡатнашты. Сараны Волга буйы федераль округында ил Президентының тулы хоҡуҡлы вәкиле Игорь Комаров үткәрҙе. Көн тәртибенә фәнни-техник үҫеш мәсьәләләре һәм Рәсәй төбәктәренең технологик суверенитетын формалаштырыуҙағы роле инде. Ултырышта шулай уҡ вице-премьер Дмитрий Чернышенко ҡатнашты, Фән һәм юғары белем министры Валерий Фальков, Рәсәй сәнәғәт һәм сауҙа министрының беренсе урынбаҫары Василий Осмаков, Рәсәй Фәндәр академияһының вице-президенттары Владислав Панченко һәм Сергей Чернышев, төбәк етәкселәре, власть органдары, үҫеш учреждениелары, бизнес-берләшмәләр һәм йәмәғәт ойошмалары вәкилдәре ҡатнашты. Игорь Комаров үҙ сығышында илдең именлеген һәм үҫешен ышаныслы фәнни нигеҙ һәм яңы технологиялар менән тәьмин итеүен һыҙыҡ өҫтөнә алды. Рәсәй Президенты Владимир Путиндың 2024 йылдың 7 майындағы указы менән технологик етәкселек илдең 2030 йылға тиклемге һәм 2036 йылға тиклемге осорға милли үҫеш маҡсаттарының береһе тип билдәләнә. – Технологик суверенитет проблемаларын уңышлы хәл итеү, иҡтисад һәм йәмғиәт ихтыяждарын ҡәнәғәтләндереү өсөн төбәктәрҙе берҙәм фәнни-техник киңлеккә дөрөҫ интеграциялау мөһим, – тине Игорь Комаров. Рәсәй Президентының Волга буйы федераль округындағы тулы хоҡуҡлы вәкиле Башҡортостанды илдең фәнни-техник үҫеше лидерҙары араһында билдәләне. Хәтерегеҙгә төшөрәбеҙ, 2022 йыл йомғаҡтары буйынса төбәк Фәнни-техник үҫештең Милли рейтингында урын алды. Рәсәй Федерацияһы премьер-министры урынбаҫары Дмитрий Чернышенко билдәләүенсә, төбәк коллективтарының бизнес, юғары уҡыу йорттары һәм ғилми ойошмалар менән килешеп берлектәге тырышлығы мөһим роль уйнай. Университет-ара студенттар кампустарын булдырыу проекттары бындай хеҙмәттәшлектең сағыу миҫалдары булып тора. Бындай учреждениелар үҙ эшен башлаған тәүге төбәктәрҙең береһе Башҡортостан булған. Илдең фән һәм юғары белем биреү министры Валерий Фальков билдәләүенсә, фәнни-техник үҫеш проблемаларын хәл итеү сиктәрендә кадрҙар әҙерләү системаһы камиллаштырыла. Әйтәйек, «Фән һәм университеттар» милли проекты сиктәрендә 2020 йылдан мәғариф һәм фән министрлығы юғары белем алыу мөмкинлеге мәсьәләһен, тәү сиратта, төбәктәрҙә эҙмә-эҙлекле хәл итә. Фото Башҡортостан Башлығы сайтынан алынды.