“Башҡорт аты” Мәскәүгә барып етте

Баймаҡ телевидениеһы директоры Зөлфиә Сафина Мәскәү ҡалаһына барып, “Ер асыштары” фестиваленә ебәргән “Башҡорт аты” фильмы менән оло еңеү яулап ҡайтты. Фильм “Тормош байрамы” номинацияһында иң яҡшылар рәтенә ингән һәм “Ҡара әле, ниндәй ил!” платформаһында урынлаштырылған. Бөгөн илдең генә түгел, ә тотош донъяла теләгән һәр кем был платформаға инеп, Башҡортостан Республикаһы “төймә”һенә баҫып, “Башҡорт аты” фильмын ҡарай ала. Әйткәндәй, Зөлфиә Дәүләтбай ҡыҙының тыуған еренең ысын патриоты булараҡ, Баймаҡ ҡалаһының 85 йыллыҡ юбилейына төшөрөлгән “Баймаҡҡа һөйөү менән” тип аталған фильмы ла призлы урын алған. “Ер асыштары” геобрендтар фестивале директоры Надежда Явдолюк менән “Рәсәй ҡалалары союзы”ның Эксперт советы рәйесе Андрей Максимовтың ҡулынан “Башҡорт аты” фильмының “Ҡара әле, ниндәй ил!” платформаһында урынлаштырыу фактын раҫлаусы диплом менән бүләкләнде. — Ни өсөн “Башҡорт аты”мы, сөнки ул райондың – төп бренды. Беҙҙең район республикала йылҡы малы буйынса беренсе урында тора, халҡы ла йылҡысылыҡ һәм ҡымыҙсылыҡ менән ныҡ шөғөлләнә. Район буйлап тәбиғәттең ниндәй урынына сыҡма, унда өйөр–өйөр йылҡыларҙы, ҡолондарҙың уйнаҡлауын күрергә мөмкин. Ситтән ҡарап торһаң, былар иҫ киткес күренеш. Ә инде тап башҡорт атын яҡлау, һаҡлау буйынса сараның беҙҙең районда үткәрелеүе, йыл һайын “Башҡорт аты” фестивален яҡтыртыу, унда әллә күпме иҫ киткес геройҙар менән осрашыу тап ошо теманы һайларға ярҙам итте лә инде. Ысынлап та, башҡа халыҡтар үҙҙәренең милли байрам, фестивалдәрен төрлө каналдарҙа күрһәтә икән, ни өсөн беҙ, башҡорттар, үҙебеҙҙә үткәрелгән сараны башҡа халыҡтарға ла күрһәтмәҫкә һәм таратмаҫҡа тейешбеҙ әле? “Башҡорт аты” фестивале хәҙер халыҡ–ара кимәлгә күтәрелде. Шуныһы ҡыуаныслы: Рәсәйҙең 45 төбәгенән ебәрелгән 300–ҙән ашыу эш араһынан 145-е шорт-биткә эләгеп, төрлө биләмәләрҙең брендын булдырыуҙағы платформаға индерелә. Һәм улар араһында “Башҡорт аты” фильмы еңеү яулай, “Баймаҡҡа һөйөү менән” фильмы ла “Ер асыштары” платформаһында урын ала,–тип һөйөнөсө менән уртаҡлаша Зөлфиә Дәүләтбай ҡыҙы. Баймаҡ районының төп брендлы сараларының береһе булған “Башҡорт аты” фестивале быйыл да үҙенең сағыу программалары менән хайран ҡалдырасаҡ. Кем белә, бәлки ул артабан да кемделер тағы ла яңы еңеүҙәргә илтер. Алдан хәбәр итеүебеҙсә, "Башҡорт аты" халыҡ-ара башҡорт тоҡомло аттар фестивале 15-16 августа Баймаҡ районының йәмле Граф күле янында үтә. Сара өсөнсө тапҡыр республика Башлығы Радий Хәбировтың Указына ярашлы ойошторола. Автор фотоһы.