Ҡойоп ямғыр яуа, көн бик йылы ла түгел, әммә тәбиғәттең көйһөҙлөгөнә ҡарамайынса, Ейәнсура районы хакимиәте махсус хәрби операция биләмәһендәге һалдаттарға гуманитар ярҙам йыйып, хәйерле юл теләп оҙатты. – Яҡташ һалдаттарыбыҙ һораған кәрәк-яраҡты ғына алдыҡ һәм тейешле урынға йыйҙыҡ, – тине Сәлимйән Ғафаров. – Бензин менән эшләгән генераторҙар, радиостанциялар, радиотулҡындарҙы шәйләүсе махсус ҡоролмалар, шөрөп борғостар, бысҡылар һәм башҡа әйберҙәр шуға асыҡ миҫал. Бынан тыш, аҙыҡ-түлек хәстәрләү тураһында ла онотмағандар. Мәҫәлән, сәк-сәк, туҡмас, быҡтырылған ит, тыуған яҡ яландарынан йыйылған үлән сәйҙәре, тоҙло ҡыяр һәм помидорҙар, ҡайнатмалар, бал һәм башҡа төрлө иҫкермәй ҙә, боҙолмай ҙа торған ризыҡтарҙы матур итеп ҡаптарға тултырып, машинаға тейәгәндәр. Шул иғтибарға лайыҡ: Ейәнсура районы хакимиәте махсус хәрби операция биләмәһендәге яҡташтарыбыҙға гуманитар ярҙамды даими оҙатып тора. Күмәкләгән – яу ҡайтарған, тибеҙ. Ейәнсураларҙың әүҙемлеген, бер-береһенә теләктәшлеген, ярҙамсыллығын билдәләмәү мөмкин түгел. БЕЛЕШМӘ ӨСӨН Хәтерегеҙгә төшөрәбеҙ, Рәсәй Президенты 1 августан 31 декабргә тиклем килешеү төҙөгән хәрби операцияла ҡатнашыусыларға 400 мең һум күләмендә бер тапҡыр бирелә торған түләү тураһындағы указға ҡул ҡуйҙы. Бынан алда Башҡортостанда республика Башлығы Радий Хәбировтың ҡушыуы буйынса контрактсыларға бер тапҡыр бирелә торған түләү күләме артты. Шулай итеп, федераль түләүҙәрҙе иҫәпкә алып, Башҡортостандан хәрбиҙәр бер тапҡыр 1 миллион 205 мең һум аҡса аласаҡ. Ҡыҙыҡһындырған һорауҙар менән Ситуация үҙәгенә - 122 йәки (347) 218-19-19 һандарына, һайлап алыу пунктына - (347)248-29-31 шылтыратырға мөмкин. Рәмил Мырҙабулатов фотоһы.