5 августа Өфөлә ҡыҫҡа ваҡытлы ялда булған “Башҡортостан” мотоуҡсылар полкы хәрбиҙәрен оҙаттылар. Донбассҡа махсус хәрби операцияла ҡатнашыусыларҙы оҙатыуҙа Башҡортостан Хөкүмәте Премьер-министры урынбаҫары Ирек Сәғитов, Өфөнөң Совет районы хакимиәте башлығы урынбаҫары Фәнүр Ҡәйүмов, республиканың Хәрби комиссариаты вәкиле, подполковник Дмитрий Смирнов, шулай уҡ Өфөнөң беренсе йәмиғ мәсете имам-хатибы Ислам хәҙрәт Һәм Өфөнөң Богородица Раштыуаһы кафедраль соборы настоятеле иерей Вадим Корбашов ҡатнашты. Ирек Сәғитов хәрбиҙәргә Башҡортостан Башлығы Радий Хәбировтың сәләмдәрен еткерҙе һәм республика етәксеһенең улар менән ғорурланыуын билдәләне. Хөкүмәт Премьер-министры урынбаҫары һүҙҙәренсә, “Башҡортостан” полкы хаҡлы рәүештә алдынғы подразделениелар рәтендә иҫәпләнә. – Һеҙ - батыр яугирҙәр. Башҡортостан Башлығы Радий Фәрит улы Хәбиров исеменә командирҙарығыҙҙан килгән рәхмәт хаттары ошо хаҡта һөйләй. Һеҙҙең өсөн борсолабыҙ, тере һәм имен ҡайтыуығыҙҙы теләйбеҙ. Һеҙгә һәм ғаиләләрегеҙгә ярҙам итәсәкбеҙ. Был хаҡта борсолмағыҙ. Яҡын арала республиканан алғы һыҙыҡҡа ҙур гуманитар колонна барасаҡ, кәрәкле әйберҙәрҙе килтерәсәкбеҙ. Намыҫ менән хеҙмәт итегеҙ һәм еңеү менән ҡайтығыҙ, – тип мөрәжәғәт итте хәрби хеҙмәткәрҙәргә Ирек Сәғитов. Оҙатыу сараһында яугирҙәрҙе генерал Шайморатов миҙалы менән бүләкләү тантанаһы үтте. Башҡортостан Республикаһы Башлығы Указы менән хәрби бурысын үтәгәндә күрһәткән фиҙакәрлеге һәм батырлығы өсөн дәүләт наградаларына яугирҙәр – И. Станислав, Н. Андрей, К. Филүс, Н. Дамир, Ф. Эдуард, К. Рим, К. Фидан, М. Денис, У. Ҡәдир, С. Рәил, Г. Айбулат, З. Айрат, К. Вилмир һәм Ф. Әхнәф лайыҡ булды. “Беҙҙә һәр хәрби хеҙмәткәр – герой. Үҙегеҙҙе һәм бер-берегеҙҙе һаҡлағыҙ”, – тип кәңәш бирҙе яугирҙәргә Ирек Сәғитов. Бөгөн фронтҡа киткәндәрҙең береһе, Ғафури районынан имам Ғәлим Кот-Мөхәммәт. Былтыр ул Оборона министрлығы менән хәрби хеҙмәткәр булараҡ контракт төҙөгән. Оборона министрлығының положениеһы буйынса махсус хәрби операцияһында бүлексәләрендә руханиҙар булғанлыҡтан, диндар хәрбиҙәр менән эшләү буйынса командирҙың штаттан тыш ярҙамсыһы вазифаһында эшләй башлай. Ғәлим Кот-Мөхәммәт Башҡортостан полкы ойошторолғандан алып үҙенең полкташтары менән йәнәш тора. Республика халҡы менән бергә хәрби күнекмәләрҙең бөтә юлдарын үтә, яугирҙәре менән махсус хәрби операция биләмәһенә инә һәм ошо ваҡыт эсендә Башҡортостан яугирҙәренең нисек сынығыуын күрә. “Һамарҙан отец Анатолий менән хеҙмәт итәбеҙ. Күреүебеҙсә, яугирҙәр Аллаға ышана башлай. Иман хәрби бәйләнеш һыҙығына яҡынайған һайын көсәйә. Хәрби операциянан һуң яугирҙәр базаға ҡайтҡас, хәл үҙгәрә. Әммә был ғәҙәти һәм ҡурҡыныс түгел. Беҙ барыбыҙ ҙа хәүеф янаған мәлдәрҙә Аллаға, әсәгә мөрәжәғәт иткән кешеләр. Яугирҙәрҙе өйрәткәндә, доғалар ваҡытында ғаилә, йорт, тыуған яҡ тураһында уйланыуҙарын һорайым. Шулай итеп, Аллаға мөрәжәғәт көсәйә, тимәк, доға ишетеләсәк. Әлбиттә, яраланғандарҙы, имгәнгәндәрҙе, һәләк булғандарҙы иҫтә тоторға кәрәк. Беҙҙең полк иң алдынғы позицияларҙа тора һәм беҙҙең яугирҙәр бер тапҡыр ҙа йөҙөбөҙҙө ҡыҙартмай. Яугирҙәр батырҙарса хеҙмәт итә һәм ҡуйылған хәрби бурыстарҙы лайыҡлы үтәй”, — тине Ғәлим Ҡәдир улы. Хәрби хеҙмәткәрҙәр Өфөнән Башҡортостан Башлығы Радий Хәбиров ҡушыуы буйынса бүленгән “Башавтотранс”тың уңайлы автобустарында юлға сыҡты. Ошо уҡ автобустар Башҡортостандың баш ҡалаһына сираттағы яугирҙәрҙе ялға алып ҡайтасаҡ. Хәтерегеҙгә төшөрәбеҙ, Рәсәй Президенты 1 августан 31 декабргә тиклем килешеү төҙөгән хәрби операцияла ҡатнашыусыларға 400 мең һум күләмендә бер тапҡыр бирелә торған түләү тураһындағы указға ҡул ҡуйҙы. Бынан алда Башҡортостанда республика Башлығы Радий Хәбировтың ҡушыуы буйынса контрактсыларға бер тапҡыр бирелә торған түләү күләме артты. Шулай итеп, федераль түләүҙәрҙе иҫәпкә алып, Башҡортостандан хәрбиҙәр бер тапҡыр 1 миллион 205 мең һум аҡса аласаҡ. Ҡыҙыҡһындырған һорауҙар менән Ситуация үҙәгенә - 122 йәки (347) 218-19-19 һандарына, һайлап алыу пунктына - (347)248-29-31 шылтыратырға мөмкин. Фото һәм мәғлүмәт сығанағы: www.bashinform.ru