2019 – 2023 йылдарҙа Рәсәйҙә сәнәғәт етештереүе үҫеше 12 процент, Волга буйы федераль округында 16,8 процент булһа, Башҡортостанда ул 19,6 процент тәшкил итте. Былтырғы йылды айырым алып ҡараһаҡ, етештереү индексының 106,5 процентҡа етеүен күрербеҙ, был Рәсәй буйынса уртаса күрһәткестән өс процентҡа юғарыраҡ. Бөтә был күрһәткестәргә ирешеү республика Башлығы Радий Хәбировтың етәкселек командаһының тырышлығы һөҙөмтәһендә мөмкин булды. Быйыл, мәҫәлән, сәнәғәткә дәүләт ярҙамы 30 078,5 миллион һум күләмендә ҡаралған, бынан тыш федераль ҡаҙнанан 852,6 миллион һум йәлеп итеүгә өлгәшкәндәр. Башҡортостандың Сәнәғәтте үҫтереү фондының эшмәкәрлеге лә йылдан-йыл яҡшыра. Былтыр ул дөйөм инвестицияһы 12,2 миллирд һум тәшкил иткән 44 проектҡа ярҙам күрһәткән. Шул иҫәптән пилотһыҙ авиация системалары етештергән ике предприятиеға 205,8 миллион һумлыҡ өс грант бирелгән. Радий ХӘБИРОВ, Башҡортостан Республикаһы Башлығы: “Башҡортостан бөгөнгө ҡатмарлы осорҙо лайыҡлы үтә. Беҙ хеҙмәт коллективтарын һәм уларҙың тотороҡло эшләүен һаҡлап ҡалдыҡ. Былтыр хеҙмәт етештереүсәнлеге 2,7 процентҡа артты. Республика сәнәғәт сәйәсәтенең йоғонтололоғо рейтингында Рәсәй төбәктәре араһында ике йыл рәттән беренсе урынды алды. Үткән йылда беҙҙең сәнәғәттең көнәркәшлек һәләтен үҫтереү буйынса дәүләт программаһын торошҡа ашырыуға федераль ҡаҙнанан 30 миллион һум алдыҡ, ул Сәнәғәтте үҫтереү фондына ярҙамға йүнәлтелде. Ә предприятиелар дөйөм суммаһы 128 миллион һум булған гранттар иҫәбенә кредит өсөн түләүҙәр буйынса сығымдарының бер өлөшөн ҡаплай алды. Александр Шельдяев, Башҡортостан Хөкүмәте Премьер-министры урынбаҫары – сәнәғәт, энергетика һәм инновациялар министры: “ Беҙҙә пилотһыҙ авиация системаһы тармағын үҫтереү уңышлы бара. Башҡортостан “Пилотһыҙ авиация системалары” милли проектын һәм уның эсенә ингән биш федераль проектты тормошҡа ашырыуҙа ҡатнаша. Бөтә эш Рәсәй Президенты Владимир Путиндың күрһәтмәләренә ярашлы теүәл башҡарыла. Уларҙың береһен – “Ватан пилотһыҙ авиация системаларына ихтыяж” федераль проектын – тормошҡа ашырыу барышында республикала былтыр 1039 пилотһыҙ аппарат етештерелде, ә быйылғы тәүге алты айҙа уларҙы 1565 дана эшләп сығарҙыҡ. 2030 йылға Башҡортостанда пилотһыҙ осоу аппараттарын ултыртыу буйынса 10 майҙансыҡ булдырыу планлаштырылған. Автор фотоһы.