“Красноусол”дың бер быуатлыҡ тарихы бар

15 августа Башҡортостан Башлығы Радий Хәбиров “Красноусол” шифаханаһының 100 йыллыҡ юбилейына арналған тантаналы сарала ҡатнашты. Рәсми өлөш алдынан төбәк етәксеһе шифахананың юбилейына арналған яңы аллеяны асыуҙа ҡатнашты, шыршы ултыртты. Башҡортостан Башлығы ғәмәлдәге йоҡо корпустарын үҙгәртеп ҡороу һәм биләмәне төҙөкләндереү барышын ҡараны. Шифахана директоры Рәмил Бәҙретдинов урология һәм колопроктология бүлексәләре, 120 урынлыҡ кафе-ашхана, 1,5 километр оҙонлоҡтағы саңғы роллеры трассаһы төҙөлөшөнөң дауам итеүе барышы менән таныштырҙы. Капиталь ремонт эштәре атҡарылғандан һуң йоҡо корпусында уңайлы шарттар булдырылған. Бынан тыш, административ бинаны үҙгәртеп ҡороу эштәре тамамланған. - 2022-2023 йылдарҙа дауалау-диагностикалау һәм спорт-һауыҡтырыу комплекстарын астыҡ, туҡланыу комплексын сертификатлауҙы тамамланыҡ, табиптар штатын киңәйттек, өҫтәмә 22 диагностикалау төрөн, физиотерапевтик төрҙәрҙе сафҡа индерҙек, ашханала капиталь ремонт эштәре атҡарылды, - тине Рәмил Бәҙретдинов. Тантаналы йыйылышта Башҡортостан Башлығы “Красноусол” шифаханаһы хеҙмәткәрҙәрен матур дата менән ҡотланы һәм дәүләт наградаларын тапшырҙы. - Бөгөн “Красноусол” – республика шифаханалары флагманы, илдең курорт медицинаһы лидерҙарының береһе. Башҡортостан тәбиғәтенең дауалау сифаттары, юғары сифатлы хеҙмәттәр, лайыҡлы хеҙмәтләндереү, реабилитациялауҙың заманса шарттары лайыҡлы уңыш һәм танылыу килтерҙе. Бындай ҡаҙаныштар шәп коллективтың ҙур хеҙмәте һөҙөмтәһендә мөмкин булды, - тине төбәк етәксеһе Радий Хәбиров. – “Красноусол” йәнә Бөтә Рәсәй “Шифахана” форумында билдәләнде, бер юлы өс алтын миҙалға һәм “Иң шәп шифахана-2024” тигән юғары наградаға лайыҡ булды. Төбәк етәксеһе ойошманың бюджетты тултырыуҙа һәм яңы эш урындарын булдырыуҙа тос өлөш индереүен билдәләне. - “Красноусол” балалар, мәғариф, социаль ойошмаларға ҙур ярҙам күрһәтә. Махсус хәрби операцияла ҡатнашыусылар өсөн гуманитар конвой формалаштырыуҙа ярҙам өсөн айырыуса ҙур рәхмәт, - тип белдерҙе республика Башлығы Радий Хәбиров. – Шифахана директоры Рәмил Рафаил улы Бәҙретдиновҡа ла рәхмәт. Ул шәп коллективты булдырған һәм шифаханаға яңы һулыш индергән. 2022 йылдан шәп үҙгәрештәр барлығын күрәбеҙ. “Красноусол” шифаханаһы генераль директоры Рәмил Бәҙретдинов республика етәкселегенә ярҙам өсөн рәхмәт белдерҙе һәм хеҙмәттәштәренә емешле хеҙмәт өсөн рәхмәт әйтте. Журналистар менән аралашҡанда Башҡортостан Башлығы Радий Хәбиров шифахананың шифахана-курорт тармағы һәм сәләмәтлек туризмы үҫешенә өлөш индереүен әйтте. Республика Башлығы шифаханала махсус хәрби операцияла ҡатнашыусылар һәм уларҙың ғаилә ағзаларының ял итеүен, дауаланыуын айырыуса билдәләне. - Республика шифаханалары – Башҡортостан милкендә, - тине төбәк етәксеһе Радий Хәбиров. – Беҙҙең контурҙағы шифаханалар табышлы. Уларҙың инвестиция программалары бар, үҫешә. Бер яҡтан, социаль мәсьәләләрҙе тормошҡа ашыралар, шул уҡ ваҡытта иҡтисадтың мөһим өлөшө булып торалар. Сығанаҡ, фото: glavarb.ru/rus/press_serv/novosti/181821.html