Республика ямғырҙан зыян күргән автомобиль юлдарын тергеҙеүгә өҫтәмә аҡса бүлә

Республика ташҡындан зыян күргән юл участкаларын тергеҙеүгә аҡса бүлә. Башҡортостан Башлығы Радий Хәбиров үткәргән “Транспорт сәғәте” кәңәшмәһендә ошо хаҡта һүҙ барҙы. Төбәктең транспорт һәм юл хужалығы министры вазифаһын башҡарыусы Любовь Минакова, оҙайлы ҡойма ямғырҙар йылғаларҙа һыу кимәленең күтәрелеүе сәбәпсе булды, тип хәбәр итте. Һөҙөмтәлә Әбйәлил, Баймаҡ, Белорет, Бөрйән, Йәрмәкәй, Йылайыр, Салауат һәм Учалы райондары биләмәһендә 22 саҡрымдан ашыу автомобиль юлы һәм 26 күпер һыу аҫтында ҡала һәм өлөшләтә емерелә. Юл хеҙмәттәре муниципалитеттар менән берлектә юлдарҙың боҙолған участкаларын урап үтә һәм һыу төшөү менән юлдарҙы тергеҙеүгә тотона. Юл һәм күпер участкаларын ремонтлау өсөн территориаль заказда өҫтәмә рәүештә 123,7 миллион һум ҡаралған. Аҡса муниципалитеттарға яҡын арала килә башлаясаҡ. Башҡортостан Башлығы һауа шарттары яҡшырыу менән ремонт эштәрен кисекмәҫтән башларға ҡушты. – Хәлде контролдә тотоу зарур. Сираттағы оператив кәңәшмәлә райондарҙа был эште нисек башҡарыуҙары хаҡында фекер алышасаҡбыҙ. Бөтә емерелгән юл участкаларын тәртипкә килтерергә кәрәк, - тине төбәк етәксеһе Радий Хәбиров. Кәңәшмәлә ҡатнашыусылар “йәмһеҙләгән” юлдарҙы ремонтлау программаһын тормошҡа ашырыу барышын да ҡараны. Хәтерегеҙгә төшөрәбеҙ, ул республика Башлығы тәҡдиме менән 2023 йылда эшләй башланы. 2024-2026 йылдарҙа йәмғеһе 216 саҡрым оҙонлоҡтағы 80 объектты, шул иҫәптән 30 муниципалитет биләмәһендәге биш күперҙе ремонтлау күҙаллана. Мәҫәлән, 2024 йылда 104 саҡрым оҙонлоҡтағы 51 трасса участкаһын ремонтлау тамамланасаҡ. Иң ҙур объекттар иҫәбендә – Баймаҡ һәм Хәйбулла райондарында Сибай – Аҡъяр, Иглин районында Иглин – Кәлтә, Яңауыл районында Яңауыл – Иҫке Күрҙем, Илеш районында Яңы Маты – Рсай юлдары. Эштәр билдәләнгән графикка ярашлы алып барыла. Бынан тыш, “Транспорт сәғәте”ендә транспорттың ауырлығын контролдә тотоу һәм юл хәрәкәте ҡағиҙәләрен боҙоуҙы автомат теркәү системаларын үҫтереү ҡаралды. Хәтерегеҙгә төшөрәбеҙ, төбәктә юл япмаһын һаҡлау маҡсатында 20 ауырлыҡ-габарит контроле пункты булдырылды. Башҡортостан Башлығы өҫтәмә пункттар урынлаштырыу буйынса тәҡдимдәр индерергә ҡушты. Юлдарҙа шулай уҡ юл хәрәкәте ҡағиҙәләрен боҙоуҙы теркәү камералары эшен камиллаштыралар. Һүҙ юл сатында йөрөү ҡағиҙәләрен боҙоу, хәрәкәт иткән ваҡытта телефон аша һөйләшеү һәм хәүефһеҙлек ҡайыштары өсөн яуаплылыҡ тураһында бара. Төбәк юлдарында бөтәһе 1,7 меңдән ашыу юл хәрәкәте ҡағиҙәләрен боҙоуҙы автоматик теркәү комплексы ҡуйылған. Фото: glavarb.ru