Արցախի խորհրդարանական «Միասնական հայրենիք» կուսակցության ղեկավար, ԱՀ անվտանգության խորհրդի նախկին քարտուղար Սամվել Բաբայանը արցախյան քաղաքական ուժերին առաջարկել է ՀՀ ընտրություններին մասնակցել միասնական ճակատով, գրում է «Հրապարակ» օրաթերթը։
Թերթի տեղեկություններով՝ Բաբայանի և արցախցի քաղաքական գործիչների շրջանում նախընտրական տրամադրություններ են։
«Բաբայանը հանդիպումներ է նախաձեռնում քաղաքական ուժերի հետ։ Նա առաջարկում է ձևավորել արցախցիների դաշինք ու մասնակցել հերթական կամ արտահերթ համապետական ընտրություններին՝ լսելի դարձնելու արցախցիների թե՛ սոցիալական, թե՛ Արցախ վերադարձի հետ կապված խնդիրները»,- ասված է հրապարակման մեջ։
Թերթի տեղեկություններով՝ ԱՀ ԱԺ խորհրդարանական ընդդիմության ներկայացուցիչները Բաբայանի հետ վերջին հանդիպմանը չեն համաձայնել միասնական ճակատով ընտրություններին մասնակցելու առաջարկի հետ։ «Նրանք նշել են, որ Հայաստանում խտրական տարանջատում կա` արցախցիներ-հայաստանցիներ մասով, և հիմա եթե գնան այդ ճանապարհով, ներքին թշնամանքն ավելի են խորացնելու։ Բաբայանին նաև հիշեցրել են, որ Հայաստան բռնի տեղափոխված արցախցիների զգալի մասը չունի Հայաստանի քաղաքացիություն, ուստի՝ ընտրության իրավունք, ինչն արդեն կանխորոշում է գործընթացի ձախողումը։
Բաբայանն առաջարկել է նաև ձևավորել նոր մարմին, որով կփորձեն հայաստանյան իշխանությունների հետ համագործակցել, ինչը ևս չեն ընդունել՝ հասկացնելով, որ հենց ինքն է ուզում ղեկավարել այդ մարմինը՝ դառնալով արցախցիների փաստացի ղեկավար: Բաբայանին ասել են, որ Արցախը պետական ինստիտուտներ ունի, և նոր մարմնի ձևավորումը կնշանակի դրանց լուծարում, ինչը հենց իշխանությունների ուզածն է»,- նշել է թերթը։ Հանդիպմանը Բաբայանը վստահեցրել է, որ տևական ժամանակ է չի շփվում հայաստանյան իշխանությունների հետ, սակայն նրա խոսքերին ներկաները չեն հավատացել, հավելել է թերթը։
«Հրապարակը» մարտին գրել էր, որ Բաբայանն առաջիկա ընտրություններին մտադիր է հանդես գալ ընդդիմադիր դաշտում։
Նորություններին հետևեք մեր կայքում, ինչպես նաև Telegram-ում և YouTube-ում