2 августа Шишмә районында Башҡортостан Башлығы Радий Хәбиров “Патриот” хәрби-патриотик паркында булды, унда Рәсәйҙең Һауа десанты ғәскәрҙәре көнөнә арналған тантаналы сарала ҡатнашты. – Ошондай көндө алдығыҙҙа тороу – минең өсөн ҙур хөрмәт. Һәләк булған десантсы, Рәсәй Геройы Максим Серафимовтың исемен йөрөткән паркта сарабыҙҙы үткәрәбеҙ. Һеҙ уның тураһында барыһын да беләһегеҙ, – тине республика Башлығы Радий Хәбиров. – Һауа-десант ғәскәрҙәре иң ҡатмарлы һәм ауыр бурыстарҙы башҡара. Ҡайһы саҡта үҙ ғүмерҙәрен хәүеф аҫтына ҡуйып булһа ла маҡсаттарға өлгәшәләр. Яугирҙәргә яҡты иҫтәлек. Һәләк булған бер кешене лә онотмаясаҡбыҙ. Республика ошо егеттәрҙе хәтерләйәсәк. Үҙебеҙҙең илде ҡорал менән һаҡлаусыларға һәр саҡ хөрмәт белдереп, ярҙам ҡулы һуҙып торорбоҙ. Бөгөн ҡунаҡтар араһында – Афғанстанда Ватанды һаҡлаусылар күп, махсус хәрби операцияла ҡатнашыусы йәш егеттәр ҙә бар. Беҙ һеҙгә һәр ваҡыт рәхмәтлебеҙ һәм һәр ваҡыт оло ихтирам менән ҡараясаҡбыҙ. Төбәк етәксеһе МХО яугирҙәрена булышлыҡ иткән, ныҡлы тылды тәьмин иткән, йорт усағын һаҡлаған әсәләргә һәм ҡатындарға рәхмәт һүҙҙәрен белдерҙе. Шулай уҡ Башҡортостан Башлығы ил Президенты Владимир Путинға “Башҡортостан” мотоуҡсылар полкының Даян Мурзин исемендәге башҡорт батальонының взвод командиры Илдар Суфияровҡа үлгәндән һуң Рәсәй Геройы исемен биреү тураһында үтенес ебәреүен хәбәр итте. 2024 йылдың апрелендә көсөргәнешле атыу һуғышы ваҡытында ул күҙәтеү пунктында үҙ позицияһын тулыһынса тота һәм дошман килгәс, үҙен граната менән шартлата, өҫтәүенә ВСУ-ның өс һалдатын юҡ итә. Республика Башлығы Радий Хәбиров һалдаттарға һәм офицерҙарға, йәмәғәт ойошмалары вәкилдәренә дәүләт наградалары тапшырҙы, шулай уҡ “Патриот” паркында уҙған “Геройҙар уҙыштары” еңеүселәрен бүләкләне. Ҡаршылыҡтар менән йүгереүҙә республиканың төрлө мөйөштәренән 65 команда ҡатнашты. Беренсе урынға Салауат районы командаһы лайыҡ булды, икенселә – Нефтекама, өсөнсө урында Шишмә районы. Рәсәй Геройы, һауа-десант ғәскәрҙәре генерал-майоры Сергей Тулин сарала ҡатнашыусыларға ҡотлау һүҙҙәрен еткерҙе. – Десант ғәскәрҙәре – ул армияның ғорурлығы. Улар бөгөн дә МХО зонаһында ҡатмарлы бурыстар үтәй, – тине Сергей Тулин. – Республика етәкселегенә Һауа-десант ғәскәрҙәре көнөн икенсе йыл рәттән “Патриот” паркында уҙғарыу мөмкинлеге өсөн рәхмәт. Десантсыларҙың барыһына ла рәхмәт. Беҙ һәр ваҡыт бергә булдыҡ һәм буласаҡбыҙ. Тантаналы өлөштән һуң Башҡортостан Башлығы МХО ветерандары, “Башҡортостан” мотоуҡсылар полкы яугирҙәре менән аралашты, уларҙың үтенестәрен тыңланы һәм уларға махсус хәрби операция бурыстарын үтәүҙә уңыштар теләне. Байрамда ҡатнашыусылар менән бергә төбәк етәксеһе десант ғәскәрҙәре, республика Парашют спорты федерацияһы һәм “Первушин” бәләкәй авиация аэродром комплексы ветерандарының күрһәтмә сығыштарын күҙәтте. Бынан тыш, республика Башлығы Радий Хәбиров “Патриот” паркында исемен йөрөткән Максим Серафимовтың әсәһе менән осрашты. Улар 2025 йылда, 30 йәше тулғас, Рәсәй Геройына һәйкәл ҡуйыу мәсьәләһен тикшерҙе. Өфө егете Максим Серафимов – армия генералы Василий Маргелов исемендәге Рязань юғары һауа десанты команда училищеһын тамамлаған. Тәүге көндәрҙән үк ул махсус хәрби операцияла ҡатнаша. Үҙенең һуңғы һуғышында өлкән лейтенант Серафимов, иң көслө дошмандың көсөн кире ҡағып, ташланған ВСУ гранатаһын үҙенең тәне менән ҡаплай. Офицер ҡорал буйынса иптәштәрен үлемдән ҡотҡарған. Хәтерегеҙгә төшөрәбеҙ, 2022 йылдың сентябрендә “Патриот” паркында герой хөрмәтенә стела асылды. – Беҙ ата-әсәләр менән паркта сквер ойошторорға һәм һәйкәл ҡуйырға тип һөйләштек, – тип хәбәр итте республика етәксеһе Радий Хәбиров. Журналистар менән аралашҡанда Башҡортостан Башлығы Радий Хәбиров ошондай саралар уҙғарыуҙың һәм хәрби хәрәкәт ветерандарының йәштәрҙе илһөйәрлек рухында тәрбиәләүҙә ҡатнашыуының мөһимлеге хаҡында һөйләне. – “Патриот” паркында был байрам өсөн яҡшы шарттар булдырылған, уларҙың кәйефе лә күтәренке. Шуныһы мөһим: бында ғаиләләре менән киләләр. Малайҙар үҫә һәм аталарына ҡарай. Был бик яҡшы тәрбиәүи мәл, – тип йомғаҡ яһаны республика етәксеһе Радий Хәбиров. – Бында физкультура-һауыҡтырыу комплексы төҙөлдө, киләһе йылда бассейн барлыҡҡа киләсәк. Парк үҫешә. Ул бик күп планлы – ғаилә, патриотик. Бында медицина әҙерлеге, илһөйәрлек тәрбиәһе, хәрби хеҙмәт нигеҙҙәре кеүек йәшәү өсөн бик кәрәкле күнекмәләр бирелә. Фото: Башҡортостан Башлығы сайты.