Бөгөн – Һауа-десант ғәскәрҙәре көнө. Ошо көн айҡанлы Өфө ҡалаһының Калинин районы хакимиәте башлығы Ғәзизйән Әхмәтйәнов Бөйөк Ватан һуғышы ветераны Николай Васильевич Васильевты ошо байрам менән ҡотланы. Николай Васильевичҡа 100 йәш һәм Һауа-десант ғәскәрҙәре көнө уның өсөн айырыуса мөһим, сөнки ул Бөйөк Ватан һуғыш ваҡытында Һауа-десант ғәскәрҙәрендә хеҙмәт иткән. Оло йәштә булыуына ҡарамаҫтан, әле лә ветерандың яугир рухы һаҡланған. Ул һаман да, үҙенә хас шаянлыҡ менән, тормошондағы ваҡиғалар, һуғыш йылдары тураһында һөйләй. Николай Васильев 1942 йылда Һауа-десант ғәскәрҙәренә тәғәйенләнә. 3-сө Украина фронты составында разведчик булып хеҙмәт итә. Киев, Днепр өсөн алыштарҙа ҡатнаша, Австрияны, Венгрияны һәм Чехословакияны азат итә. Демобилизациянан һуң Өфөгә килә, Урал политехник институтын тамамлай, эске эштәр органдарында эшләй. – Хөрмәтле Николай Васильевич! Һеҙҙе Һауа-десант ғәскәрҙәре көнө менән ҡотлайым, һаулыҡ һәм именлек теләйем. Шулай уҡ Һауа-десант ғәскәрҙәрендә хеҙмәт иткән йәки әле хеҙмәттә булған һәр кемде ихлас ҡотлайым. Һеҙгә һәм яҡындарығыҙға бәхет, һаулыҡ һәм именлек! – тип ҡотлау һүҙҙәрен еткерҙе Ғәзизйән Әхмәтйәнов. Һауа-десант ғәскәрҙәре командующийы Михаил Теплинский Һауа-десант ғәскәрҙәре көнө менән ҡотланы. Ул сығышында махсус операция ваҡытында 70 десантсының Рәсәй Геройы булыуы тураһында һөйләй. Хөрмәтле десантсылар, һеҙҙе байрамығыҙ менән ҡотлайбыҙ! “Беҙҙән башҡа бер кем дә!” девизына һәр саҡ шулай тоғро ҡалығыҙ! Фото: https://t.me/AkhmedyanovGG/2401