Фронт һыҙығындағы ваҡиғалар Тыуған илен кем ысын күңелдән яратҡанын һәм бының өсөн барыһын да бирергә әҙер булғанын асыҡ күрһәтә. Ысын геройҙар, ҡыйыу һәм тәүәккәл кешеләр, ҡулдарына ҡорал тотоп Ватанды һаҡларға әҙер. Шуларҙың береһе – “Бодрый” позывнойын йөрөткән отставкалағы полиция подполковнигы. Махсус хәрби операцияға бармаҫҡа сәбәптәре күп була уның: күп балалы атай, полицияла эшләү йылдары ла эҙһеҙ ҡалмаған – һаулығы ҡаҡшаған. Шуға ҡарамаҫтан, ул ҡәтғи ҡарарға килеп, үҙ ирке менән Салауат Юлаев исемендәге батальонға яҙыла. Ҡайҙа хеҙмәт иткәне хаҡында һорағанда, “Бодрый” ҙур ғорурлыҡ менән формаһы еңендәге билдәне күрһәтә.– Доброволец булырға этәргән күңел ынтылышын бер-ике һүҙ менән генә аңлатып булмаҫ, – ти ул. – Был ниндәйҙер ҡапыл тыуған хис түгел, ә аңлы, төрлө яҡлап үлсәнелгән һәм, әлбиттә, бик ҡатмарлы ҡарар ине.Ә бит хәҙер күп кенә аҡыл һатырға яратҡан кеше, диванда ятҡан килеш кенә телевизорҙан яңылыҡтар ҡарап, үҙҙәре фронтта булһа, ни тиклем аҡыллы эш итерҙәре тураһында һөйләргә ярата. Шундай “комментатор”ҙар рәтенә инмәҫ өсөн, яу яланына барырға хәл иттем. – Яугирҙәрҙең кәйефе нисек?– Унда тормош бик эмоциональ. Хәрби кейем кейеп, ҡулдарына ҡорал алғас, ир-егеттәр күҙ алдында үҙгәреп китә, үҙҙәрен көслө, батырлыҡҡа һәләтле итеп хис итә башлай.– Республика халҡына үҙ исемегеҙҙән дә, иптәштәрегеҙҙән дә нимә тип әйтергә теләр инегеҙ?– Тормошта һәр кемдең, әлбиттә, үҙ юлы бар. Берәүҙәр уны эҙләй генә әле, ә икенселәр үҙ маҡсатына табан аныҡ хәрәкәт итә, фронт һыҙығына сығырға әҙерләнә йәки күптән инде башҡаларҙы – иң яҡшы йылдарын бушҡа үткәргәндәрҙе ҡурсып, алғы һыҙыҡта йөрөй. Яугир әйтеүенсә, уны өйҙә ике улы һәм ҡыҙы көтә.– Ҡыҙым, әлбиттә, ҡайтыуымды түҙемһеҙләнеп көтә. Мине күргәс, хис-тойғоларын йәшерә алманы. Ярты сәғәт буйы өндәшмәй генә ҡосаҡлашып торғанбыҙҙыр, моғайын. Өйҙә һине көтөп, борсолоп, доға ҡылып торғандарын белеү иҫ киткес ҡәҙерле. Илебеҙҙең, балаларыбыҙҙың киләсәге яҡты булһын өсөн нацистарға ҡаршы көрәшәбеҙ ҙә инде, – ти “Бодрый”. Эльвина Ғафарова.Благовар районы. (https://blvesti.ru/news/aktualno/2024-07-03/podpolkovnik-v-otstavke-iz-bashkirii-ushel-dobrovoltsem-na-svo-3833124)