Баҡалы районы Баҡалы ауылындағы “Көнбайыш” паркы ауыл халҡының һәм ҡунаҡтарының яратҡан урынына әйләнде. Бер нисә йыл эсендә буш майҙан төҙөкләндерелгән паркка – төрлө йәштәге кешеләрҙе йәлеп иткән төп урындарҙың береһенә әйләнде. Социаль киңлектә эштәр 2020 йылдан “Торлаҡ һәм ҡала мөхите” милли проектының “Уңайлы ҡала мөхитен булдырыу” федераль проектын тормошҡа ашырыу барышында алып барыла. Тәүге этапта паркта асфальт-бетон япмалы юлдар һалынған, эскәмйәләр һәм урналар ҡуйылған. 2021 йылда паркта асфальт-бетон япмалы һәм тротуар плиткаһы менән юл һалыу эштәре дауам ителгән, автомобилдәр ҡуйыу урыны төҙөлгән, яҡтыртҡыс фонарҙар, видеокүҙәтеү камералары ҡуйылған, паркты бәләкәй архитектура формалары менән биҙәгәндәр. 2022 йылда паркта брусчатка япмалы аллея булдырылған, биләмә йәшелләндерелгән, беседкалар ҡуйылған һәм йәмғиәт киңлеген биҙәүҙе дауам иткәндәр. Проект сиктәрендә 2023 йылда парктың бер өлөшө төҙөкләндерелгән һәм асфальт-бетон япмалы сауҙа майҙансығын тәртипкә килтереү, яҡтыртыу, йәшелләндереү һәм павильондар ҡуйыу эштәре башҡарылған. Ағымдағы йылда балалар һәм спорт майҙансыҡтарында резина япма, ваҡ формалар архитектураһы ҡоролмаларын урынлаштырыу эштәре башҡарыласаҡ. Биләмә халыҡҡа бик кәрәк: иртә таңдан ҡара кискә тиклем бында скандинавса йөрөүселәрҙе, тренажёрҙарҙа, балалар майҙансыҡтарында ял иткән, физкультура менән шөғөлләнгән, велосипедта, роликта, самокатта йөрөүселәрҙе күрергә мөмкин. Билдәле булыуынса, “Торлаҡ һәм ҡала мөхите” (национальный проект “Жилье и городская среда”) милли проекты Рәсәй Президенты Владимир Путиндың май указы менән булдырылды. Фото: Торлаҡ-коммуналь хужалыҡ министрлығы.