Бөгөн төндә Рәсәй Ғәҙәттән тыш хәлдәр министрлығының Башҡортостан буйынса Баш идаралығына Өфөнөң Цюрупа урамындағы янғын тураһында хәбәр итәләр. Янғын һүндереүселәр килгән мәлдә күп фатирлы йорттоң етенсе ҡатындағы фатирҙа әйберҙәр янған була. Ҡотҡарыу эштәре барышында төтөнлө урындан ете кешене махсус битлек кейҙереп сығаралар, шуларҙың икәүһе - бала. 15 кеше тышҡа үҙаллы сыҡҡан. Ҡыҙғанысҡа ҡаршы, янғын һүндереү барышында аш бүлмәһендә 1963 йылғы ирҙең кәүҙәһе табыла. Ваҡиға урынында Рәсәй Ғәҙәттән тыш хәлдәр министрлығының тәфтиш-оператив төркөмө һәм тәүтикшереүсе эшләй. Фото: Рәсәй Ғәҙәттән тыш хәлдәр министрлығының Башҡортостан буйынса Баш идаралығынан.