Ишембай парктары яңырыу кисерә

ЙӘМӘҒӘТ КИҢЛЕГЕ Ишембай ҡалаһында урынлашҡан Александр Матросов исемендәге Мәҙәниәт һәм ял паркы халыҡтың яратып йөрөгән урыны. Был паркта әллә күпме быуын сабыйҙар үҫкән. Шуға ла уның заманса, матур булыуы ишембайҙар өсөн бигерәк тә мөһим. Республика етәкселеге лә ҡала, ауылдарҙың үҫешен күҙаллағанда уларҙың тышҡы йөҙөнә иғтибар биреү кәрәк тигән талап ҡуя. Был йәһәттән “Уңайлы ҡала мөхитен булдырыу” федераль проекты уңышлы эшләй. Уға ярашлы, 2019 йылдан республикабыҙҙа 683 йәмәғәт биләмәләре төҙөкләндерелде, уларҙың 123-ө былтыр башҡарылған. Ишембайҙың да тышҡы йөҙө йылдан-йыл матурлана. Һуңғыларына күҙ һалғанда, Башҡорт нефтен тәүләп асыусылар майҙаны ҙур үҙгәрештәр кисерә. Ҡала үҙәгендә урынлашҡан Мәҙәниәт һәм ял паркында ла ҙур эштәр ҡуҙғатылған. Ҡала хакимиәте башлығы урынбаҫары Радик Күсәрбаев билдәләүенсә, паркта төҙөкләндереү саралары былтыр башланған. Был эштәр ике программа буйынса алып барыла. Бәләкәй ҡалалар һәм тарихи биләмәләр конкурсында еңеү һәм ”Уңайлы ҡала мөхитен булдырыу” программаһы төҙөкләндереүгә юл аса. Былтыр парктағы элекке ҡорамалдар һүтеп алынған, коммуникациялар, электр үткәргестәр ҡабаттан һуҙылған, йәйәүлеләр зонаһы яңыртылған, уйын, спорт майҙансыҡтары барлыҡҡа килгән, яңынан яҡтыртҡыстар ҡуйылған. Был эштәрҙе башҡарыу өсөн күпселек федераль ҡаҙнанан, шулай уҡ республика һәм урындағы бюджеттан аҡса бүленгән. Быйыл да “Уңайы ҡала мөхитен булдырыу” программаһы буйынса эш дауам итә. Был маҡсатта 42 миллиондан ашыу һум аҡса йүнәлтелгән. Паркта иртәнге сәғәттәрҙә үк эштең ҡайнап тороуын үҙебеҙ ҙә күрҙек. Төҙөкләндереү яйлап ҡына тамамланыуға бара. Әлеге көндә амфитеатр ҡорола, сәхнә эшләнә, яҡтыртҡыстар көйләнә, йәйәүлеләр юлы һалына. Был эштәрҙе август аҙағына Ҡала көнөнә тиклем тамамлау ниәтләнә. Халыҡтың да кәйефен белешеп өлгөрҙөк. Парк аша үтеп барған Нурия апай беҙҙең һорауға ихлас яуап бирҙе. – Мин яҡында ғына йәшәйем. Шуға электән ошо паркка килергә яратам. Биләмәнең төҙөкләнеүен күреү бигерәк тә ҡыуаныслы. Һуңғы осорҙа эш айырыуса ныҡ йылдам бара. Йәштәр ошо матурлыҡты һаҡлаһындар, ҡәҙерен белһендәр ине , – тине ул. Яңы өйләнешкәндәр өсөн сквер Парлы тормош юлына яңы аяҡ баҫҡандар өсөн Ишембай ҡалаһында былтыр яңы сквер барлыҡҡа килгән. Уның ЗАГС бинаһы эргәһендә генә булыуы ҡала йөҙөн тағы ла йәмләп, тулыландырып ебәрә. Биләмәне төҙөкләндереү алдынан бында ҙур эш башҡарылған. Тирә –яҡты йәмһеҙләп ултырған ҡыуаҡлыҡтар киҫелгән, төҙөлөш ҡалдыҡтарынан таҙартылған. Йәйәүлеләр өсөн юл, никахлашыусылар өсөн фотозона эшләнгән, сквер уртаһына йөрәк формаһы бик килешле итеп урын алған, бәләкәй генә амфитеатрҙың да үҙ йәме. Бер үк ваҡытта бында йәшелләндереү эштәре лә бара. Әлбиттә, эш бының менән генә бөтмәйәсәк. Киләсәктә был урынды тағы ла матурлау, тулыландырыу ниәтләнә. Радик КҮСӘРБАЕВ, Ишембай ҡала биләмәһе хакимиәте башлығы урынбаҫары: – Әле Мәҙәниәт һәм ял паркында төҙөкләндереү эштәре тулыһынса тамамламаһа ла, унда килеүселәр күп. Каникул булғас, балалар уйын майҙансығынан өҙөлмәй, бигерәк тә яҡын-тирәлә йәшәүселәр өсөн уңайлы. Яңыртылған парк ишембайҙарҙы һәм ҡунаҡтарҙы йәлеп иткән урынға әүереләсәк. Яңы өйләнешкәндәр өсөн скверҙы ла халыҡ яратып ҡабул итте. ЗАГС-тан һуң ошо скверға кереп, иҫтәлеккә фотоға төшөү матур йолаға әүерелә. Мәҙәниәт һәм ял паркы булһынмы, яңы өйәнешкәндәр скверымы тап ошо биләмәне төҙөкләндереүҙе халыҡ үҙе һайланы. Шуға ла улар өсөн дә төҙөкләндерелгән урындар ҡәҙерлелер, тип уйлайым. Автор фотолары.