Рәсәй Иҫәп палатаһы рәйесе Борис Ковальчук менән осрашыу

Башҡортостан Башлығы Радий Хәбиров баш ҡалала БРИКС сиктәрендә юғары аудит органдары башлыҡтарының дүртенсе йыйылышында Рәсәй Федерацияһының Иҫәп палатаһы рәйесе Борис Ковальчук менән осрашты. Билдәләп үтәйек, 2024 йылдан Рәсәй халыҡ-ара берекмәнең рәйесе булып тора. Осрашыуҙа Башҡортостан Башлығы республиканың Рәсәй Иҫәп палатаһы менән үҙ-ара эш итеү һөҙөмтәлелеген юғары баһаланы. – Беҙ палата менән төрлө мәсьәләләр буйынса тығыҙ эшләйбеҙ, тәҡдимдәрегеҙгә иғтибар итәбеҙ, отчеттарҙы һәм аналитиканы иҫәпкә алабыҙ, – тип билдәләне төбәк етәксеһе. - Дәүләт ресурстарын һаҡсыл файҙаланыу беҙҙең өсөн бик мөһим. Бюджет финанстары илде, республиканы үҫтереү, иҡтисадты һәм социаль өлкәне нығытыу, ҡалаларҙы һәм ауылдарҙы төҙөкләндереү, кешеләрҙең тормошон яҡшыртыу өҫтөндә адреслы эшләһен өсөн. Иҫәп палатаһы рәйесе үҙ сиратында тотороҡло үҫеш көн тәртибен тормошҡа ашырыуҙа төбәктәрҙең мөһим ролен билдәләне, шулай уҡ Өфөлә БРИКС-тың юғары аудит органдары башлыҡтарының сираттағы осрашыуын үткәреүҙең әһәмиәтен һыҙыҡ өҫтөнә алды. - 2015 йылда тап бында – илебеҙҙең иң үҫешкән төбәктәренең береһенең баш ҡалаһында - БРИКС һәм Шанхай хеҙмәттәшлек ойошмаһы саммиттары үтте. Был осрашыуҙар ошо ике ойошманың ғына түгел, Өфөнөң дә үҫешенә етди этәргес бирҙе. Эре сәнәғәт һәм мәғариф үҙәге статусы менән бер рәттән, ул мөһим халыҡ-ара саралар үткәреү урыны ла булып тора. Быйыл Өфө үҙенең 450 йыллығын билдәләй. Бындай яҡшы сара БРИКС-тың юғары аудит органдары башлыҡтарының уңышлы эшләүенә булышлыҡ итер, тип ышанам, - тине Борис Ковальчук. Осрашыуҙа төбәк министрлыҡтарының һәм ведомстволарының Рәсәй иҫәп түләүҙәре менән үҙ-ара эш итеүен камиллаштырыу мәсьәләләре, шулай уҡ ил Президенты Владимир Путин тәҡдим иткән милли проекттарҙың тотороҡло үҫешен тәьмин итеү, стратегик бурыстарын һәм маҡсаттарын үтәү өсөн палата тәҡдимдәре тикшерелде. Белешмә: 2024 йылдың 30 июлендә Өфөнөң «Торатау» конгресс-холында БРИКС сиктәрендә юғары аудит органдары башлыҡтарының дүртенсе осрашыуы үтә. Элек эшлекле сара өсөн майҙансыҡ булып Пекин (ҠХР) һәм Нью-Дели (Һиндостан) торҙо. 2020 йылда коронавирус пандемияһы осоронда осрашыу видеоконференция форматында үтте.