Яугирҙәрҙең әсәйҙәре һәм ҡатындары “Яҡтыкүл” шифаханаһында бушлай ял итеп ҡайтҡан

Хәйбулла районында махсус хәрби операция биләмәһендәге яугирҙәрҙең ғаиләләре иғтибарһыҙ ҡалмай. Үҙ бурыстарын батырҙарса үтәп, һуңғы һулышына тиклем Ватаныбыҙҙың киләсәге өсөн һәләк булған яугирҙәрҙең ғаиләһе, балалары бар яҡлап иғтибар үҙәгендә. Бер төркөм яугирҙәрҙең әсәйҙәре һәм ҡатындары сәләмәтлектәрен нығытыу маҡсатында “Яҡтыкүл” шифаханаһында бушлай ял итеп ҡайтҡан, балалары өсөн йәйге ял лагерҙарына юлламалар бирелгән. Район хакимиәте башлығы Рөстәм Шәрипов ялға ҡайтҡан яугирҙәрҙең һәр береһе менән шәхсән осраша һәм уларҙың ғаиләһенә ниндәй ярҙам талап ителә - барыһын да хәл итә. Авто һәм мототехника, күсмә мунса, эш ҡоралдары, мейес-буржуйка, автозапчасть, беспилотник, тепловизор, дронға ҡаршы одеял, дарыу, маскировкалау селтәрҙәре... Барыһын да һанап бөтөрлөк түгел. Махсус хәрби операция башланғандан алып, Хәйбулла халҡы ҡул ҡаушырып ултырмай, еңеү һәм егеттәрҙең имен-һау ҡайтыуы өсөн берҙәм эш башҡара. Район хакимиәте башлығы Рөстәм Шәрипов бер нисә тапҡыр махсус хәрби операция зонаһына гуманитар ылау оҙатып барҙы. Бөгөн райондан 300-ләп егет хәрби бурысын үтәй. Төрлө урында берләшеп эшләгән өс ирекмәндәр төркөмө бар. Һәр бер ауылда, һәр бер кеше тиерлек ошо эштә әүҙем ҡатнаша. Егеттәрҙән килгән заявкалар буйынса эшләйҙәр. Бөгөн 15-тән артыҡ техника МХО-ға йүнәлтелгән. Улар араһында “УАЗ”, “Нива”, “ГАЗель”, еңел машиналар, мотоцикл, квадроциклдар һәм башҡалар бар. Шулай итеп, үҙәкләштерелгән 20-ләп гуманитар ылау оҙатылған. Фото: Рөстәм Шәриповтың "Бәйләнештә"ге сәхифәһенән.