Башҡортостанда күрше республиканан турист һәләк булған. Был турала Рәсәй Ғәҙәттән тыш хәлдәр министрлығының Башҡортостан буйынса Баш идаралығы матбуғат хеҙмәтенән хәбәр иттеләр. Фажиғә Бөрйән районында Мәндәғол менән Иҫке Собханғол ауылдары араһында була. 35 кешенән торған туристик төркөм Ағиҙел буйлап катамарандарҙа ағып төшә. “Ҙур Амфитеатр ҡаяһы” районында бер ир кеше катамарандан төшөп китә. Әйтеүҙәренсә, уның сумкаһы ағып китә һәм ул уны алырға була. Яр Саллы ҡалаһынан килгән 50 йәшлек ир ҡотҡарыу жилеты кеймәгән була. Ул шунда уҡ һыу аҫтына китә һәм башҡаса сыҡмай. Оҙайлы ямғырҙар арҡаһында йылғаның ташыуы ла фажиғәгә сәбәпсе булғандыр. Әлеге ваҡытта ҡотҡарыусылар ирҙең кәүҙәһен эҙләй, ул ошоға тиклем табылмаған. Фото: МЧС.