Ошо көндәрҙә Күгәрсен районының Йомағужа ауылында мотоцикл ҡатнашлығында авария теркәлгәйне. Һөҙөмтәлә ошо ауылда йәшәгән 27 йәшлек ир һәләк булды. Яҡынса мәғлүмәттәр буйынса, “Irbis” мотоциклына Салауат ҡалаһынан 29 йәшлек ир идара иткән, ә артында пассажиры ултырған. Бер ваҡыт водитель руль менән идара итеүҙе юғалта һәм мотоцикл юл ситенә төшөп китә. Водителдең дә, пассажирҙың да шлемдары булмай сыға, тип хәбәр итәләр Башҡортостан буйынса дәүләт автоинспекцияһының матбуғат хеҙмәтендә. Авария һөҙөмтәһендә ике егет тә дауаханаға оҙатыла. Бер сәғәт тирәһе ваҡыт үткәс, пассажиры аңына килмәй һәләк була. КП-Өфө хәбәр итеүенсә, ул – 27 йәшлек Вячеслав С. Уның кәләше һәм бәләкәй ҡыҙы тороп ҡалған. Йомағужала Вячеславты, уның ата-әсәһен, һеңлеһен барыһы ла белә. Урындағы халыҡҡа был яңылыҡ аяҙ көндә йәшен һуҡҡандай тәьҫир иткән. – Мин ышанмайым. Беҙ бер ауылдан,уның класс етәксеһе булдым. Әлеге ваҡытта икенсе өлкәлә йәшәйем, шуға ла авария тураһында тулыраҡ мәғлүмәт белмәйем. Әммә шуны әйтә алам: шәп егет булды. Ҡыҙына өс йәш тирәһе ине, – тип һөйләгән КП-Өфөгә егеттең ауылдашы һәм мәктәп уҡытыусыһы. – Нисек былай килеп сыҡты һуң?! Бигерәк йәш инең, ышанмайым, – тип яҙған социаль селтәрҙәрҙә һәләк булыусының ауылдашы. Йәш атай тураһында ауылдаштары тик яҡшы яҡтан ғына иҫкә ала һәм күптәр был хәлгә ышанмай. Вячеславтың кәләшенең, ҡыҙының, ата-әсәһенең, һеңлеһенең ауыр ҡайғыһын уртаҡлашалар. Әйткәндәй, ауыл халҡы төнөн Йомағужала һәр ваҡыт үҫмерҙәрҙең мотоциклдарҙа йөрөүенә зарлана, шуға ла улар ошо хәлгә урындағы властың һәм дәүләт автоинспекцияһының иғтибар итеүен һорай. Шул уҡ ваҡытта авария сәбәптәре асыҡлана. Башҡортостан дәүләт автоинспекцияһында билдәләүҙәренсә, ул төндә Хоҙайбирҙин урамында булған хәлгә асыҡлыҡ индерер өсөн бер нисә экспертиза тәғәйенләнгән. Фото: КП-Өфө, ГАИ.