Гүзәл Уразова киң билдәле “Өфө йүкәләре” йырына яңы музыкаль клип төшөрөп, тамашасыларын һөйөндөрмәксе. Ул барлыҡ Башҡортостан халҡына ҙур бүләк. Видеоны Салауат Юлаев һәйкәле, Ағиҙел яры, “Ете ҡыҙ” фонтаны, Арт-квадрат кеүек ҡаланың иң гүзәл урындарында төшөргәндәр. Гүзәл Уразова Өфө ҡалаһы мэрына легендар композицияны башҡарып сығырлыҡ мөмкинлек тыуҙырғаны өсөн рәхмәт белдергән. Йырҙың яңыртылған версияһы 31 августа Өфөнөң 450 йыллығын байрам иткәндә күрһәтеләсәк. Йырсы үҙ блогында “Миңә ышанғанығыҙ һәм йырҙы тапшырғанығыҙ өсөн рәхмәт. Ул, яңыртылып, халыҡ күлендә тағы бик оҙаҡ йәшәр әле”, тип яҙған. “Өфө йүкәләре” 1970 йылдарҙан бик популяр һәм ҡаланың рәсми булмаған гимнына әүерелгән. Фото: социаль селтәрҙәр.