Заман парашютын Санкт-Петербургтан совет инженеры Глеб Евгеньевич Котельников уйлап сығарған, тиҙәр. Әйткәндәй, ул беренсе тапҡыр донъяла ранец парашютының да авторы. Хәҙер иһә был спорт төрө беҙҙе һоҡландырып ҡына ҡалмай, хатта Башҡортостан ҡыҙҙары ла һауаны яулай. Күптән түгел Күмертау ҡыҙы, спорт мастеры Евгения Торгашева Бөтә Рәсәй ярыштарында беренселекте яуланы. Ул 20 йылдан ашыу был спорт төрө менән шөғөлләнә, тип хәбәр итте Башҡортостандың Спорт министрлығының матбуғат хеҙмәте. Шулай итеп, ул Йошкар-Олала үткәрелгән шәхсән ярыштарҙа – беренсе, республикабыҙ командаһы менән берлектә өсөнсө урынға сыҡты. -Беҙҙең спорт башҡа спорт төрҙәренә оҡшамаған. Ул экстремаль тип һанала, әммә инструкцияларҙы теүәл үтәһәң, был – спорттың хәүеф төрҙәренең береһе. Ер матурлығын ҡош осошо бейеклегендә күҙәтә алабыҙ, - тип белдергән Евгения Юрьевна. Төрлө спорт төрҙәренең үҫеше Рәсәй Президенты Владимир Путиндың май указдарына ярашлы барлыҡҡа килгән “Оҙон һәм әүҙем тормош” милли проекты (национальный проект “Долгая и активная жизнь”) бурыстарын тормошҡа ашырырға булышлыҡ итә. Фото, сығанаҡ: Башҡортостандың Спорт министрлығы.