«Журналист һөнәрен алмаштыра» рубрикаһы дауам итә. Ошо нигеҙҙә бер көнгә Аҡъяр ауылының почта бүлексәһендә ысын почтальон булдым. Был ни тиклем ауыр, әммә кәрәкле һөнәр икәнен мин, «Хәйбулла хәбәрҙәре» гәзите хәбәрсеһе Илнара Аптикова, үҙ тәжрибәмдә инандым. Компьютер технологиялары һәм юғары тиҙлекле, интернет һәм кеҫә телефондары заманында ла почтальондарҙың эше кәмемәй.
Эш көнө почта бүлексәһенән башланды. Тап шунда иртә таңдан гәзит-журналдар, хаттар килә һәм улар шул уҡ көндө адресатҡа барып етергә тейеш. Махсус бүлектәкорреспонденциялар ауылдар буйынса бүленә. Артабан Аҡъяр участкаһында эшләгән 5 почтальондың һәр береһе үҙ участкаһы буйлап ашыға.
Почтальон Гүзәл апай Сынғыҙованың эш көнө«сортировочный»ҙа үҙ участкаһына ҡараған подписчиктарҙың корреспонденцияларын барлау һәм теүәлләүҙән башлана. Артабан уларҙы таратыу өсөн үҙенә уңайлы булған маршрут төҙөй. Был, үҙ көсөңдө, ваҡытыңды рациональ файҙаланыу өсөн мөһим. Бына мин дә ҡәләм һәм блокнотты ситкә ҡуйып, тәжрибәле почтальон менән бер рәттән ошо хеҙмәтте үҙ иңемдә татып ҡарау маҡсатында, Аҡъяр урамдары буйлап гәзит таратырға сыҡтым. Гүзәл Тәлғәт ҡыҙы бик яҡшы әңгәмәсе лә. Эш араһында мине ҡыҙыҡһындырған һорауҙарға яуаптарын да еткерҙе.
Юғары технологиялар заманында гәзит-журналдарға яҙылыусылар кәмемәнеме?
- Аҡъярҙа йәшәүселәр төрлө баҫмаларға яҙыла. Тик һуңғы ваҡыттарҙа яҙылыусылар һаны кәмене, сөнки халыҡ хәҙер яңылыҡтарҙы интернеттан уҡырға күнекте. Оло йәштәгеләр - «Хәйбулла хәбәрҙәре», “Хайбуллинский вестик” район гәзиттәренең даими уҡыусылары. Балалар һәм үҫмерҙәр өсөн дә журналдар алдыралар.
Гүзәл апай, ә бына көнөнә нисә километр юл үтәһегеҙ?
- Смена эсендә 10 саҡрымдан ашыу араны үтергә тура килә. Бына егерме биш йыл тиерлек, шулай. Эшем һис тә ялҡатмай, сөнки кешеләрҙе яратам һәм улар менән аралашам. Аҡъяр бәләкәй, бөтәһен дә беләһең, өҫтәүенә һәр ваҡыт саф һауала, ә көн һайын үткән километрҙы фитнес менән сағыштырырға мөмкин – был кәрәкле менән файҙалыны берләштереү.
Ә бөгөн элекке кеүек хат яҙыусылар бармы?
- Бөгөн хат алышыуҙы ойошмалар ғына алып бара, тип әйтһәң дә була. Хаттар һәм открыткалар технологик прогресс осоронда юҡҡа сығып бара. Заказ хаттар йыш була, уларҙы адресаттар ҡулына тапшырырға кәрәк, өйҙә булмаған осраҡтарҙа белдереү ҡағыҙҙары ҡалдырабыҙ. Почта хеҙмәткәрҙәре ваҡытлы баҫмаларға яҙылыуҙы ла ошоштора.
Почтальонға эшендә ниндәй проблемалар осрай?
-Иң тәүгеһе, берәҙәк эттәр, уларҙан тешләнгәнем дә булды. “эткә ҡурҡыуыңды күрһәтергә ярамай, сөнки улар ҡурҡыуҙы алыҫтан һиҙәләр”, - тип әйтһәләр ҙә, тешләнгәндән һуң ҡурҡыу тойғоһо ҡалды. Күп йылдар эшләгәс ҡайҙа ниндәй эт булыуын, бәйлеме-бәйһеҙме икәнен белеп тә бөткәнмен. Хәүефһеҙлек өсөн почтальондарҙың ҡулында һәр ваҡыт “газ баллончигы” бар. Икенсе проблема, ҡайһы йорта почта йәшниктәре булмауы бәләгә һуға.
Ҡояштай почтальон
- Мин һәр ваҡыт яҡшы кәйефтә булырға, осраған кешеләрҙе йылмайып сәләмләргә тырышам. Әгәр оло йәштәге кеше ярҙам һораһа, ярҙам итәм. Төрлө хәлдәр килеп тыуа, шуны ла иҫәпкә алырға кәрәк: бөгөнгө көндә гәзит яҙған кешеләр-башлыса оло йәштәге кешеләр, уларға ҡарата, әлбиттә, кешелекле, сабыр булырға кәрәк. Тағы ла почтальон яҡшы физик формала булырға тейеш, сөнки күп йөрөргә лә, яурында ауыр сумка йөрөтөргә лә тура килә.
Эш көнөнөң аҙағында почтальондарҙың проблемалары етерлек, тигән һығымтаға килдем. Был эттәр ҙә, почта йәшниктәренең булмауы ла. Ҙур физик көсөргәнеш һәм километрҙар тураһында әйтеп тораһы ла түгел. Тренажер зал да кәрәкмәй. Ә бит ниндәй генә һауа шарттары булмаһын, улар һәр ваҡыт эштә булырға тейеш.
Шулай итеп, бер көн почтальон һөнәрендә эшләп ҡарап, 10 саҡрымдай юл үтеп, журналист һөнәре күңелемә яҡын тигән фекергә килдем. Ә почтальон хеҙмәте ни тиклеи ауыр, яуаплы булыуы менән оло хөрмәткә лайыҡ.
Илнара Аптикова
https://haibh.ru/news/novosti/2024-05-16/pochtalon-bulyu-e-elme-3768511