Яуым-төшөм күп булғанлыҡтан Бөрйән районының Һарғая ауылында Башарт йылғаһының һыу кимәле күтәрелгән. Ташҡын һөҙөмтәһендә Иҫке Собханғол – Ҡағы юлынан Һарғая ауылына тиклем барған юлдың ике участкаһы һыу эсендә, шулай уҡ Бешәке йылғаһы аша күпер ҙә. Әле Һарғая ауылына Ҡолғона ауылы аша резерв юлдан барырға мөмкин. Халыҡҡа хәүеф янамай. Зыян күреүселәр юҡ. Башарт һәм Бешәке йылғаларының кимәле яйлап кәмей. Рәсәй Ғәҙәттән тыш хәлдәр министрлығының Башҡортостан Республикаһы буйынса Баш идаралығы ташҡынға бәйле хәлде контролдә тота. Шулай уҡ Башҡортостандың Ғәҙәттән тыш хәлдәр буйынса дәүләт комитеты ҡотҡарыусылары йылғаның икенсе яғына ҡайтырға талап ителгән биш турисҡа ярҙам итте. Бер кем дә зыян күрмәгән. Алдағы тәүлектә Башҡортостанда көслө ҡойма ямғыр, ел тиҙлеге секундына 20 метрға тиклем етеүе көтөлә. Автомобиль юлдарының ҡайһы бер участкаларында күреү мөмкинлеге 500 метрға тиклем насарая. Рәсәй Ғәҙәттән тыш хәлдәр министрлығының Башҡортостан Республикаһы буйынса Баш идаралығы һауа торошоноң насар булыуы сәбәпле, республика халҡын һәм ҡунаҡтарын йылға буйлап ағыуҙан, тауҙарға сәйәхәттән һәм башҡа төр туристик ялдан тыйылып тороуҙарын һорай. Шулай уҡ алыҫ араға сәфәргә сығыуҙан тыйылырға кәңәш итәләр. Иғтибарлы һәм һаҡ булығыҙ. Белорет районында ла хәлдәр шәптән түгел. Район хакимиәте башлығы Андрей Иванюта хәбәр итеүенсә, район юғары әҙерлек режимына күскән. – 26 июлдә 16:00 сәғәттән алып Белорет районы биләмәһендә мул яуым-төшөмгә бәйле юғары әҙерлек режимы индерелде. Был юлдар һәм күперҙәрҙең торошон контролдә тотоуҙы һәм мониторингты көсәйтеүҙе; ғәҙәттән тыш хәлдәрҙе иҫкәртеү һәм бөтөрөү буйынса дәүләт системаһының вазифалы кешеләренә һәм көстәренә тәүлек әйләнәһенә дежурлыҡ индереү; кәрәк булғанда, ташҡын һөҙөмтәһендә һыу аҫтында ҡалыу ихтималлығы булған ауылдарҙа эвакуация үткәреүҙе аңлата, – тип яҙҙы социаль селтәрҙә Андрей Иванюта. Мәғлүм булыуынса, бөгөн 12.00 сәғәткә ҡарата түбәндә күрһәтелгән автомобиль юлдары участкаһында һыу кимәле түбәнәйгәнгә тиклем бөтә төр транспорт саралары өсөн хәрәкәт туҡтатыла: Олойылға – Ишле – Туҡан – Егәҙе, Үрге Әүжән – Исмаҡай – Олойылға – Ишле – Туҡан – Егәҙе. Ауыл башлыҡтары менән даими бәйләнештәләр. Туҡанда һәм Исмаҡайҙа кәрәкле медицина препараттары, аҙыҡ-түлек запасы бар, урындарҙа табиптар, фельдшерҙар эшләй, халыҡты эвакуациялау талап ителмәй. Кәрәк булғанда, ашығыс хеҙмәттәрҙең юғары үтеүсәнлектәге автомобилдәрҙә йөрөү мөмкинлеге бар. Абҙаҡ һәм Ҡаҫмаҡты ауылдары араһындағы автомобиль юлынан Ҡолсоғаҙы йылғаһы аша әлегә юғары үтеү мөмкинлеге булған еңел автомобилдәрҙә үтергә мөмкин, әммә һыу кимәленең күтәрелеүе ихтимал. Шулай уҡ юл участкаһы һыу аҫтында ҡалыуына бәйле, Смеловский ҡасабаһы аша хәрәкәт иткәндә, Магнитогорск – Белорет автомобиль юлы ваҡытлыса сикләнә. Водителдәргә уңайлы һауа торошо урынлашҡанға тиклем ошо маршруттар буйынса йөрөүҙән тыйылырға кәңәш ителә. Ғәҙәттән тыш хәл килеп тыуғанда ашығыс хеҙмәттәргә - 112 һандары буйынса шылтыратығыҙ. Фото: Рәсәй Ғәҙәттән тыш хәлдәр министрлығының Башҡортостан Республикаһы буйынса Баш идаралығы, https://t.me/ivaniutaandrei/12821.