Мунса, сабыныу, үләндәр хаҡында белгегеҙ килһә, "Рәхәттә" һеҙҙе көтә!

27-28 июлдә Ҡырмыҫҡалы районының Түбәнге Тимкә ауылы янында "Рәхәттә" (“На Рахате”) һаулыҡ һәм туризм фестивале үткәрелә. Сарала республикабыҙҙан, Рәсәйҙең башҡа тарафтарынан, Үзбәкстан, Төркиә һәм Ҡытайҙан 500-ҙән ашыу белгес ҡатнашыуы көтөлә. Ҡунаҡтарҙың дөйөм һаны алты мең тирәһе булыр тип көтөлә. Башҡортостанда донъя әһәмиәтендәге уникаль тәбиғәт һәйкәлдәре урынлашҡан. Мәҫәлән, “Янғантау” геопаркы. Шифахана-курорт комплексы һәм дауалау минераль сығанаҡтары донъя кимәлендә танылыу яулаған. Республиканың алты шифаханаһы “Рәсәйҙең 100 ТОП шифаханаһы” исемлегенә ингән. Республикала медицина туризмы ла әүҙем үҫешә. Башҡортостандың был йәһәттән потенциалы ҙур. Республикабыҙ офтальмология, травматология, кардиология, медицина генетикаһында айырыуса көслө. Башҡортостан дәүләт медицина университетының робот һәм гибрид хирургияһы үҙәктәрендә йөҙәрләгән ҡатмарлы операциялар эшләнә. Ошондай матур тәбиғәтле төбәктә үткәрелгән фестиваль ҡунаҡтары өсөн бай эшлекле программа ҡаралған. Унда Башҡортостанда халыҡ-ара туризмды үҫтереүҙең, медицина туризмының көнүҙәк мәсьәләләре, Рәсәй төбәктәре менән сит илдәр араһында был өлкәлә хеҙмәттәшлекте киңәйтеү буйынса һөйләшеүҙәр планлаштырыла. Ошо һәм башҡалар тураһында бөгөн “Башинформ” мәғлүмәт агентлығында үткәрелгән матбуғат конференцияһында Башҡортостандың эшҡыуарлыҡ һәм туризм буйынса министры Зөһрә Гордиенко, тышҡы иҡтисади бәйләнештәр һәм конгресс эшмәкәрлеге министры урынбаҫары Алина Ильясова, “Евразия мунса федерацияһы” акционерҙар коммерцияға ҡарамаған ойошмаһы директоры Кристина Бугрова, “Кәртәләрҙе емереп” социаль технологиялар үҙәге етәксеһе Алина Хәбирова һөйләне. – Был сарала ташыусылар, ҡулланыусылар менән эшләү, туризм һәм башҡалар тураһында һөйләшеүҙәр буласаҡ. Өҫтәүенә барлыҡ шифаханалар ҡатнаша. Был индустрия менән ҡыҙыҡһынғандарҙың барыһын да саҡырабыҙ. Ысынлап та, бөгөн ялды мунсаһыҙ күҙ алдына килтереп булмай. Был – һәйбәт һәм сәләмәт ял, – тип һөйләне Зөһрә Мәүлетбай ҡыҙы. – Сарала милли аш-һыуҙар менән танышырға мөмкин. Дарыу үләндәре тураһында хәбәрҙар, дөрөҫ мәҙәни аралашыу шаһиттары буласаҡһығыҙ. Файҙалы мәғлүмәттәр менән уртаҡлашырға йыйынған кешеләр араһында биология фәндәре кандидаты, үләндәр менән дауалау үҙәктәре етәксеһе Михаил Гордеев, билдәле блогер-сәйәхәтсе Рөстәм Нәбиев бар. Тәүгеһе үләндәрҙең шифаһы тураһында һөйләһә, билдәле блогер экстремаль туризм хаҡында бәйән итәсәк. Бынан тыш, дөрөҫ туҡланыу буйынса, Башҡортостан шифаханаларында дауаланыу тураһында лекциялар ойошторола. Фестивалдә мунса оҫталығы, күмәк сабыныу буйынса ярыштар үткәреү ҙә ҡаралған. Бынан тыш, бай мәҙәни программа көтөлә, массаж зоналары булдырыла, һыу аттракциондары эшләй, “ГастроРәхәт” сараһы, оҫталар йәрминкәһе һәм башҡа күп төрлө күңел асыу, ял итеү сараларын үткәреү күҙаллана. Был фестиваль мунсала сабыныу серҙәрен аңларға мөмкинлек бирә. Шулай уҡ сара ҡунаҡтары илдең алдынғы мунсасыларының ярыштарын күрә аласаҡ. Программа бик бай булмаҡсы: илдең төрлө тарафтарынан күсмә һәм модулле мунсалар ҡуйыласаҡ, төрлө оҫталыҡ дәрестәре үтәсәк, милли ризыҡтар урын аласаҡ. Тағы үләндәр йыйыусыларҙың форумы ойошторола. Уларҙы йыйыу, әҙерләү, эшкәртеү, һаҡлау, ташыу, маркировкалау буйынса мәсьәләләр ҡараласаҡ. Белгестәр бизнеста был йүнәлештең көнүҙәклеген тикшерәсәк. Фестивалде ҡалдырмай ҡарарға, ҡатнашырға теләүселәр палаткалар ҡаласығында ҡуртымға палатка ла алып тора ала. Ә сара үткәрелгән урынға иртәнге сәғәт 10-дан Өфөләге “Торатау” конгресс-холынан һәм “Ҡашҡаҙан” паркынан алты рейс ойошторола. Улар халыҡты 17-00 сәғәткә тиклем фестивалгә ташый. Ҡайтыр яҡҡа шул уҡ автобустарҙа 19.00, 20.00 һәм 20.30 сәғәттәрҙә юлланырға була. Бынан тыш, фестиваль ҡунаҡтары өсөн бушлай туҡталҡа була. Сараға инеү ирекле. Ентекләберәк түбәндәге сайтта танышығыҙ: https://нарахате.рф. Тағы белешмәләрҙе 8-800-101-10-12 телефоны аша алырға мөмкин. 0+ Автор фотолары.