Хәйбулла районының Степной ауылы крәҫтиән (фермер) хужалығы етәксеһе Илгиз Тазетдинов 10 йылдан ашыу инде малсылыҡ, үҫемлекселек менән шөғөлләнә. Һуңғы арала ул башҡорт тоҡомло аттарҙы үрсетеүгә, шулай уҡ уларҙы бәйгегә сығарыуға күп көс һала. Әйткәндәй, уның юртаҡтары һабантуй, “Терра Башҡортостан” кеүек күләмле саралар бәйгеһендә сабышып, гел алдынғы урындар яулай. Ошо көндәрҙә улы Рәфис сираттағы еңеүе менән ҡыуандырҙы. Өфөнөң Таһир Күсимов исемендәге “Аҡбуҙат” халыҡ-ара ипподромында халҡыбыҙҙың мәшһүр “Аҡбуҙа” эпосы призына башҡорт тоҡомло аттар араһында ярышта икенсе урынды яуланы. 2400 метр арауыҡта ярышта ул үҙенең “Алан” ҡушаматлы саптарында алдынғылыҡты бирмәне. Рәфистең был тәүге еңеүе түгел, ул район һабантуйында, “Генерал Миңлеғәле Шайморатов призына”, ХХ “Салауат йыйыны” республика фольклор фестивале сиктәрендә ойошторолған ат спорты ярыштарында 1-се урынды алған. Улының еңеүендә атаһының өлөшө ҙур. Әйткәндәй, Рәфис август айында Баймаҡ районында үтәсәк “Башҡорт аты” халыҡ-ара башҡорт тоҡомло аттар фестивалендә ҡатнашырға әҙерләнә. Фото: "Хәйбулла хәбәрҙәре".