Саҡмағош районы хакимиәте башлығы Реканс Фәнил улы ЯМАЛИЕВ - ҙур тормош һәм хеҙмәт багажы туплап, тап ошо яуаплы вазифаны иңенә алған тәжрибәле етәксе. Берҙәмлек менән күп һынауҙар лайыҡлы үтелгән, көтөлмәгән пандемия ла, уға бәйле башҡа мәсьәләләр ҙә... “Махсус хәрби операция иғлан ителеү менән талаптар ҙа, мәшәҡәттәр ҙә бермә-бер артты, был бурыстарҙы бары халыҡ менән бергә кәңәшләшеп кенә күтәреп була”, тип иҫәпләй етәксе. Хәрби операция зонаһына бер нисә тапҡыр барып ҡайтҡан башлыҡҡа яҡташтарының тын алышы ла, еңеүгә ышанысы ла, теләктәре лә яҡшы таныш. Иң мөһиме – халыҡ менән тығыҙ аралашыу, уларҙың фекерен тыңлау һәм ишетеү, йәмәғәтселәрҙе кешеләр менән эшләүгә ылыҡтырыу. Шул саҡта районда, шул иҫәптән тотош республикала, бөтә милләт халҡын бер усҡа йыйып, тотороҡлоҡҡа, үҙ-ара аңлашып эшләүгә ирешергә мөмкин. Йәшме, ҡартмы, студентмы әллә абруйлы ил ағаһымы, һәр береһен ихтирам менән тыңлай белеү, үтенестәрен хәл итергә тырышыу мөһим, тип һанай ул. - Махсус хәрби операцияла ҡатнашҡан яҡташтарыбыҙ, орден-миҙалдарға лайыҡ егеттәребеҙ менән сикһеҙ ғорурланабыҙ. Мәҫәлән, Ҡаран ауылынан,”Герой” колхозы тракторсыһы дошмандың радиоэлектрон ҡоролмаһын юҡ итеп, “Хәрби отличие өсөн” миҙалы менән наградланды. Ул ғына ла түгел, бер улы яңыраҡ армияла хеҙмәт итеп ҡайтты, икенсеһе атаһы артынан ҡалышмаҫҡа теләп, алғы һыҙыҡҡа йүнәлде. Бына ниндәй дан ғаиләләр бар беҙҙә! Яҡташтарыбыҙ хәрби әҙерлеккә оҙатылғандан алып улар менән тығыҙ бәйләнештәбеҙ, ихтыяждарына, үтенестәренә ярашлы кәрәк-яраҡтар менән тәьмин итәбеҙ, ғаиләләренә төрлө яҡлы ярҙам күрһәтәбеҙ. Гуманитар ярҙам илтеү һәм хәрбиҙәрҙең көнкүреше, кәйефе менән танышыу маҡсаты менән дүрт тапҡыр сәфәргә сыҡтыҡ. Алғы һыҙыҡтағы егеттәребеҙгә ошондай ихлас осрашыуҙарҙың ни тиклем мөһим, һулар һауалай кәрәклеген тойҙоҡ, бер ниндәй матди ярҙам да яҡташтарҙың яҡынлыҡ тойғоһон, осрашыу йылыһын алыштыра алмай икән шул. Райондың яҡташтар ойошмаһы етәксеһе Фәрит Хөрмәтулла улы Ғиндуллин ошо ҙур эштәрҙең башында йөрөй. Беҙ егеттәребеҙҙең еңеү менән тыуған яҡҡа тиҙерәк ҡайтыуын көтәбеҙ, улар беҙҙең өсөн ҙур көс, район ҡеүәтен арттырыуҙа ышаныслы ярҙамсы буласаҡ! Ватанды һаҡлаусы яҡташтарыбыҙ араһында үкенесле юғалтыуҙар ҙа бар. Уларҙың ғаиләләре менән осрашып, хәлдәрен белешеп торабыҙ, ярҙам итәбеҙ. Минеңсә, илһөйәрлек кеше тәпәй баҫып, донъяны таный башлағандан башлана. Ғаиләләге йылы мөхит, яҡындарыңдың хәстәрлеге, атай-әсәйҙең таяныс булыуы, һине кеше иткән төбәгең ырыҫы, ғәзиз ауылың, йылға-күлдәрең, урман-тауың гүзәллеге ғүмер буйы кеше аңында йәшәй. Хакимдәрҙе лә, бөйөктәрҙе лә биргән ауылды тәбиғәт тыуҙырған. Тыуып үҫкән ерҙе һаҡлауҙы, Ватанына мөхәббәтте халҡыбыҙ ата-бабаларының йолаһы итеп ҡабул итә, шуға күрә бөгөн илде һаҡлаусы егеттәребеҙ “ни өсөн һин алғы һыҙыҡта?” тигән һорауға “беҙ һаҡламай, уны кем һаҡлаһын?” тип ҡыҫҡа ғына яуап биреүсән. Был көслө тойғоно юғалтмау өсөн беҙҙән дә даими эш талап ителә. Минеңсә, балалар баҡсаһынан алып кескәйҙәрҙе хеҙмәтте һөйөргә, тирә-яҡ донъяны танырға өйрәтеү мөһим. Беҙҙә дүрт “шайморатовсылар” класы эшләүе менән ҡәнәғәтлек кисерәм. Һуғыш ветерандары, Афғанстандан иҫән-һау ҡайтҡан туҡһандан ашыу яугир менән иҫтәлекле осрашыуҙар, һәләк булғандарҙың ҡәберҙәрен тәрбиәләү, махсус хәрби операцияла ҡатнашҡандарға ярҙам ойоштороу, һалдаттарға хаттар яҙыу – барыһы ла балалар күңелендә һаҡланасаҡ. Ниндәй генә яҡшы ғәмәлдәр ҡылынһа ла, тауҙай эштәр башҡарылһа ла, беҙ уны Ватан именлеге, ныҡлығы, ҡеүәте, уға булған мөхәббәт хаҡына башҡарабыҙ. ФЕКЕР Башҡортостан Башлығы Радий ХӘБИРОВ: “Йүнәлештәрҙе беҙ билдәләнек: яугирҙәребеҙҙе, уларҙың ғаиләләрен яҡлау, илебеҙҙең оборона һәләтлеген тәьмин итеү. Һәм мотлаҡ – ижтимағи-сәйәси тотороҡлоҡ, иҡтисадты үҫтереү. Былар булмаһа, тәүге өс бурыс та үтәлмәйәсәк. Беҙ Тыуған ил өсөн һәм үҙебеҙҙе бөтә көстәрен Ватанға хеҙмәт итеүгә бирергә әҙер булған ысын патриоттар тип иҫәпләйбеҙ. Әгәр кешесә фекер йөрөткәндә, тиҫтәләгән мең егеттәребеҙ унда һуғышҡанда, ошонан да мөһимерәк нимә бармы ни? Уларға ярҙам итеүҙән дә мөһимерәк нимә бар? Был – иң мөһиме.” Айрат Нурмөхәмәтов фотоһы һәм шәхси архивтан.