Физкультурниктар көнөнә арналған конкурсыбыҙҙы Миәкә районы Ҡырғыҙ Миәкә ауылының 2-се мәктәбендә физкультура уҡытыусыһы булып эшләүсе конкурсантыбыҙ – Рамазан Илекәйев дауам итә. Рамазан Рәфил улы сығышы менән ошо райондың Илсеғол ауылынан. Һигеҙ йәштән футбол менән шөғөлләнә, төрлө ярыштарҙа район данын яҡлай. 9-сы класҡа тиклем Ҡырғыҙ–Миәкә ауылының 2-се мәктәбендә уҡый, һуңынан М.Аҡмулла исемендәге БДПУ-ның колледжында “Физкультура уҡытыусыһы” һөнәре буйынса белем ала. Ил алдындағы бурысын үтәргә лә онотмай. Колледждан һуң хәрби хеҙмәткә юллана. Армияла саҡта Силәбе өлкәһенең Сыбаркүл ҡалаһында “Звезда” футбол командаһында уйнай. Хәрби хеҙмәттән һуң тыуған яҡтарына ҡайта. Ҡырғыҙ-Миәкәлә һәм Бишбүләктә тренер булып урынлаша. Үҙенең тыуған мәктәбендә физкультура уҡытыусыһы ла булып эшләй. – Армияға тиклем Миәкә районынан ситтә ярыштарҙа сығыш яһарлыҡ үҙемдең футбол командаһын булдырыу хыялым бар ине. Был теләгемде тормошҡа ашырғанда шәхси эшҡыуар Фазылйән Фуат улы ныҡ ярҙам итте. Бағыусы булараҡ ул футбол командаһының үҫешенә ҙур өлөш индерә. Спорт – ул минең эшем генә түгел, яратҡан шөғөлөм дә. Һәр күнекмәнән һуң ҙур ҡәнәғәтлек, еңеллек алам. Холоҡто сыныҡтырырға, ныҡышмалылыҡты үҫтерергә, кешене тәртиптә тоторға ярҙам итә ул. Һәр кемгә күңелен оҡшаған спорт төрөн һайлап, спорт менән дуҫ булырға саҡырам, - тине Рамазан. Миәкә егетенең был йәһәттән ғорурланырлыҡ уңыштары ла бар. Ул өс тапҡыр Башҡортостандың призеры булған, күп тапҡырҙар район ярыштарында еңгән, Миәс ҡалаһында чемпионы исемен яулаған. Ошондай һәләтле, сәләмәт тормош алып барыуға ынтылған йәштәр – беҙҙең ғорурлыҡ. Рамазан Илекәйевҡа яңынан-яңы уңыштар теләйбеҙ. Фотолар: Рамазан Илекәйевтың архивынан.