"Лес" урман ҡырҡмай, ә дошманды ҡыра

Любовь Рәхимова – Ейәнсура районының Ишемғол ауылында ("Энәк" совхозының Үҙәк усадьбаһы) йәшәй. Бөгөн уның ире, өлөшләтә мобилизацияға ярашлы, Украинала барған махсус хәрби операцияла ҡатнаша. Ә Ватан алдындағы изге бурысын үтәгәнгә хәтлем Ейәнсура районының Иҫәнғол ауылындағы магазинда эшләгән. – Тормош иптәшем менән өс бала тәрбиәләйбеҙ, "барыһы ла – балалар өсөн!" тигән девизды алдыбыҙға алдыҡ, – тип һөйләй Иҫәнғол ауылындағы район мәҙәниәт йортоноң вахтеры Любовь Васильевна. – Иремдең позывнойы – "Лес". Үҙенә оҡшай. Ул ошоға тиклем дүрт тапҡыр ҡыҫҡа ваҡытлы отпускыла булды, шул осорҙа бәләкәстәребеҙҙең нисек шатланғанын күрһәгеҙ икән! Ысынлап та, атайҙың өйгә ҡайтыуы барыһы өсөн дә ҙур байрамға әйләнгән. Лиана – IX класта, Рәсимә VII класта уҡый, бәләкәс Руслан балалар баҡсаһына йөрөй. Любовь Рәхимованың һүҙҙәренә ҡарағанда, уларға район етәкселеге тарафынан да, республика Хөкүмәте яғынан да ҙур ярҙам күрһәтелә, йәғни дәүләт тарафынан тейешле ярҙам тоялар. Мәҫәлән, улдары Руслан балалар баҡсаһына йөрөгән өсөн ата-әсә бер тин дә түләмәй, бынан тыш, түңәрәктәр ҙә малайға бушлай. Уның бигерәк тә спорт секцияларын ҡалдырмауын маҡтап һөйләне тәрбиәселәр. Атаһы шикелле ысын ил һаҡсыһы булыу уйы менән яна кескенә бала. Бынан тыш, Рәхимовтарҙың ипотекалары булған икән, был тәңгәлдә лә республика етәкселегенең тос ярҙамын тойғандар. "Лес" – элемтәсе. Бөгөн махсус хәрби операция биләмәһендә был һөнәр - иң кәрәклеләрҙең береһе. Ысынында, "Лес" урман ҡырҡмай, ә беҙҙең яҡты киләсәгебеҙ өсөн дошманды ҡыра. – Республика, район етәкселегенә рәхмәттән башҡа һүҙем юҡ, һәр саҡ ярҙам ҡулы һуҙырға әҙерҙәр, – ти Любовь Васильевна. – Ғөмүмән, мин дә, ирем дә улай ниҙер һораныу яғында түгелбеҙ. Барыһы ла етә, бөтәһе лә бар. Эш урынымда коллегаларым мине аңлай һәм хәлемә инә. Донъя мәшәҡәттәре сығып ҡына тора бит, ҡайһы бер документтарҙы хәстәрләү яғынан да йүгергеләргә кәрәк. Әммә былар - тормош-көнкүрештең ваҡ-төйәк мәсьәләләре. Иң мөһиме - Ерҙә тиҙерәк тыныслыҡ урынлашһын, яугирҙәребеҙ еңеү менән имен-һау әйләнеп ҡайтһын! ӘЙТКӘНДӘЙ Контракт төҙөү мәсьәләләре буйынса республика халҡы берҙәм 177 белешмә номеры буйынса, Ситуация үҙәгенә 122 йәки (347) 218-19-19-19 телефондара аша, “Минең документтарым” күп функциялы үҙәгенең яҡындағы офисына мөрәжәғәт итә ала. Шулай уҡ булған һорауҙарға яуапты башбат.рф сайтында, контракт буйынса хәрби хеҙмәткә инергә теләүселәр өсөн һәм уларҙың ғаилә ағзаларына социаль ярҙам саралары тураһында "Телеграм"да мәғлүмәт таба алаһығыҙ. Башҡортостанда контракт буйынса хәрби хеҙмәткә йыйыу дауам итә. Мобиль пункттар республиканың барлыҡ ҡала һәм райондарында эшләй. Бында йыйыу тәртибе, льготалар һәм түләүҙәр тураһында консультация бирәләр, ниндәй документтар кәрәклеген аңлаталар. Дәүләт менән килешеүҙе пенсияға сыҡҡан запастағы хәрбиҙәр, саҡырыу буйынса сроклы хеҙмәттән һуң эшенән киткәндәр, шулай уҡ армияла булмаған, ләкин юғары йәки урта профессиональ белем алған ир-егеттәр ҙә төҙөй ала. Рядовойҙан алып прапорщикка тиклем контракт буйынса хәрби хеҙмәткә 65 йәшкә тиклемге ир-егеттәр ҡабул ителә. Фото: Любовь Рәхимованың шәхси альбомынан .