Йосопов Юнир Ғәйнислам улы 1974 йылдың 1 ғинуарында Архангел районының Абҙан ауылында донъяға килгән. Ул бәләкәйҙән йыр-моңға ғашиҡ бала булып үҫә, шиғырҙар яҙа, бейергә ярата. Мәктәпте тамамлағандан һуң, 1990 йылда БДУ-ның филология факультетына башҡорт теле һәм әҙәбиәте уҡытыусыһы йүнәлеше буйынса уҡырға инә. Юғары уҡыу йортон уңышлы тамамлағас, физик культура буйынса ҡайтанан әҙерлек үтергә ҡарар итә. “Атаһынан күргән - уҡ юнған” тигәндәй, Юнир Ғәйнислам улы ла атаһы кеүек (ҡыҙғанысҡа ҡаршы, бик йәшләй вафат була) ҡурайҙа, ҡумыҙҙа уйнай. Йосоповтар ғаилә ансамбле төҙөп, күп йылдар төрлө фестиваль-конкурстарҙа ҡатнашҡан, концерттар ҡуйған, призлы урындар яулаған. “Бала саҡтан атай-әсәйебеҙҙән үрнәк алып, төрлө эштәргә, шөғөлдәргә өйрәнеп үҫтек. Хәҙер үҙебеҙҙең балаларыбыҙ ҙа шулай”, – тип ҡыуана Юнир Ғәйнислам улы. Конкурсантыбыҙ күп йылдар мәктәптә эшләй: башҡорт теле һәм әҙәбиәтенән, физкультуранан уҡыта. 2021 йылда Абҙан мәктәбендә уҡытыу эштәре буйынса директор урынбаҫары була, ә 2022 йылда иһә ошо уҡ мәктәптә директор итеп тәғәйенләнә. “Абҙан мәктәбе электән спорт буйынса алдынғылыҡты бирмәй. Ярыштарҙа һәр ваҡыт ҡатнашабыҙ, призлы урындар яулайбыҙ, маҡтау ҡағыҙҙары, миҙалдар алабыҙ. Уҡыусыларыбыҙ бер ваҡытта ла һынатмай. Шулай уҡ уларҙың ата-әсәләренә лә ҙур рәхмәт, һәр ваҡыт беҙгә ярҙам итеп, сараларҙа әүҙем ҡатнаша”, – тине Юнир Ғәйнислам улы. Спорт конкурсантыбыҙҙың тормошонда иң мөһим урындарҙың береһен биләй. – Юҡҡа ғына “Сәләмәт тәндә – сәләмәт рух” тип әйтмәгәндәр, спорттың һәр төрө лә организмға ҙур файҙа килтерә. Шуны халыҡ аңлаһын ине. Спорт менән дуҫлашығыҙ, шөғөлләнегеҙ, балаларығыҙҙы ла өйрәтегеҙ! – тип һүҙен йомғаҡланы Юнир Ғәйнислам улы. Хөрмәтле дуҫтар, һеҙҙе хеҙмәте менән хөрмәт яулаған конкурсантыбыҙ - Юнир Йосопов өсөн әүҙем тауыш бирергә саҡырабыҙ! Уға уңыштар теләйбеҙ! Фотолар: Ю. Йосоповтың шәхси альбомынан.