Әсәйҙең күлдәк итәген ҡырҡыуҙан башланған шөғөл

Баймаҡ районында социаль контракт нигеҙендә адреслы ярҙам күрһәтеү уңышлы алып барыла. Әлеге мәлдә һигеҙ эшҡыуар дәүләт ярҙамы алып, үҙ эшен киңәйтеүгә өлгәшкән. Улар араһында Әминә Кәримова ла бар. Тормоштағы һәр мауығыу тиерлек үҙ эшеңде асыуға этәргес бирә алыуына Әминә Рәшит ҡыҙы үҙ миҫалында инанған, сөнки ул үҙенең яратҡан эшен социаль контракт нигеҙендә адреслы ярҙам программаһы буйынса тормошҡа ашыра алған. Бала саҡтан тегергә яратҡан ханым бизнес-план төҙөгән һәм уны конкурс комиссияһына тәҡдим иткән. Проект яҡлау табып, уның авторына 350 мең һум күләмендә субсидия алыуға ярҙам иткән. Бәләкәйҙән төрлө сағыу туҡымаларға ҡыҙығып үҫкән ҡыҙ ҡурсағына тәүге күлдәген мәктәпкә бармаҫ элек тегә. Тауарын да ниндәйен таба әле (!), әсәһенең иң матур күлдәгенең итәгенән ҡырҡып ала. Был эше өсөн ата–әсәһенән шелтә эләккәнме, юҡмы, уныһын хәтерләмәй, әммә тап шул ваҡыттан тегеүгә ҡарата һөйөүе уяна. Артабан Әминә Кәримова ҡурсаҡтарына ғына түгел, күрше ҡыҙҙарға, бәләкәс туғандарына ла әллә күпме кейемдәр тегеп кейҙерә. Уларға һайлаған туҡымалар араһында атаһының салбары ла, өләсәһенең балитәкле күлдәктәре лә ҡалмай. Өләсәһенең ҡул теген машинаһында бәләкәй генә булып тегергә маташҡан ҡыҙын күреп, атаһы уға теген машинаһы алып бирә. Өләсәһенең заказдарын бергә тегә башлай, тәүге тегеү нескәлектәренә лә тап шул саҡта өйрәнә. Бала саҡ мауығыуы йылдар үткән һайын кәмемәй, киреһенсә көсәйә генә бара. Мәктәпте тамамлағас, Баймаҡтағы 58–се һөнәрселек училищеһына уҡырға инә һәм уны ҡыҙыл дипломға тамамлай. Бында Әминә Кәримова баш кейемдәрен тегеү буйынса махсуслаша. Уҡыуын артабан дауам итеү маҡсатында Сибай педагогия колледжының технология бүлегенә документтарын тапшыра. Бер юлы зирәк ҡыҙ Магнитогорск дәүләт университетында ситтән тороп уҡып, эшҡыуар–технолог һөнәренә эйә була. Иң ҡыуаныслыһы – барлыҡ уҡыу йорттарын да ҡыҙыл дипломға тамамлай. Бөгөн үҙ эшен асҡан эшҡыуарға ҡасандыр алған белеме ныҡ ярҙам итә. – Хеҙмәт юлымды Баймаҡтағы милли кейемдәр тегеү цехында (ул ваҡытта Вилүр Рәхимғолов етәксе була - автор) башлауым менән бәхетлемен. Милли рух менән һуғарылған был цех киләсәктә үҙемә ателье асып, милли кейемдәр, кейемдәргә милли биҙәктәр, тирмә япмалары тегергә ярҙам итте. Тап шунда алған тәжрибә, Вилүр ағай Рәхимғоловтың башҡорт халҡының милли кейемдәренә ҡарата иғтибарлы булыуы һәм һәр деталенә тиклем уйлап тегеүе, биҙәктәр ҡулланғанда һәр ырыу тамғаларына тап килергә тейешлеген өйрәтеүе – минең өсөн ғүмерлек һабаҡ. Социаль контракт буйынса адреслы ярҙам аҡсаһына заманса сәнәғәт тегеү машинаһы, махсус тегеү колодкалары, пар менән үтекләгес , туҡыманы бесеү өсөн электр ҡайсы алдым, – ти Әминә Рәшит ҡыҙы. Әле эшҡыуар ҡатын элекке бәләкәй бүлмәнән ҙур һәм яҡты бинаға күскән. Бер–бер артлы теҙелеп ултырған теген машиналарының ниндәйҙәре генә юҡ?! Береһе иң нескә туҡымалар өсөн тәғәйенләнһә, икенселәре тирмә япмаһын тегеүгә уңайлы. “Эшкә тотонор алдынан бер аҙ ҡурҡыу тойғоһо булһа ла, әле килеп шуны аңланым: беҙҙең ярҙамға мохтаж булыусылар бик күп икән. Кемгәлер үҙ фасоны буйынса күлдәк кәрәк, икенселәре тәҙрә пәрҙәләре, тюлдәр буйынса мөрәжәғәт итә, күберәк ауыл хакимиәтенән, шәхси эшҡыуарҙарҙан тирмәләргә япмалар тегеүгә заказдар алына. Әйткәндәй, Әминә Кәримованың ире Илнур ҙа ҡатынына ярҙам итә. Ул тирмәнең каркасын йыя. Матур ғаиләлә бәхеттәрен тулыландырып өс бала үҫә. Айгизә, Ильяс һәм Азалина ла әсәләренең эшенә үҙ өлөшөнөн индерә, оҫта ҡуллы әсәһенең төрлө милли биҙәктәр һалып эшләгән футболкаларын кейеп, үҙҙәренсә реклама яһай. Уңған кеше бар яҡлап һәләтле тигәндәй, геройымдың тағы ла бер шөғөлө бар. Уныһы хаҡында бер аҙ һуңғараҡ таныштырырбыҙ. Социаль контракт нигеҙендә адреслы ярҙам программаһы буйынса маҡсатлы ярҙамға үҙ эшен асып, уны киңәйтергә уйлаған эшҡыуарҙар ҙа, үҙмәшғүлдәр, ғөмүмән үҙ эшен асырға теләгән һәр кеше мөрәжәғәт итә ала. Автор фотолары.