Почтальонға диплом тапшырҙыҡ

Гәзитебеҙҙең "Бәйләнештә" төркөмөндә республкабыҙҙың уңған почтальондары араһында уҙғарылған конкурста Йәрмәкәй почта элемтәһе бүлексәһе почтальоны Гөлнара Шәрифуллина 3-сө урынға лайыҡ булғайны. Ошо көндәрҙә Йәрмәкәйгә юлланып, еңеүсебеҙҙе күреп, редакциябыҙҙың дипломын тапшырып ҡайттыҡ. Гөлнара Фәнис ҡыҙы Әбделкәрим ауылынан йөрөп эшләй. Тәүге осорҙа мәшәҡәтлерәк булһа ла, хәҙер үҙе рулдә йөрөгәс, ауырлығы бик тойолмай. - Эшемдә кешеләр менән аралашыу оҡшай. Бигерәк тә оло йәштәгеләр “ҡыҙым” тип көтөп торалар. Үҙем таратҡан Әбделкәрим ауылында матбуғат баҫмаларын уҡыусылар байтаҡ. Квитанцияларын да алып барам, аҙаҡ уларҙы йыйып алып түләп, ҡабат таратып бирәм, кәрәк саҡта тауарын да алып барам, – тип һөйләне почтальон. Шулай итеп, почтальон – ауыл ерендә ололарҙың ҙур ярҙамсыһы, терәге. Эшендә генә өлгөр түгел, ғаиләһе өсөн дә өҙөлөп тора Гөлнара Шәрифуллина. Тормош иптәше Азамат менән улар өс бала: ике ҡыҙ, бер ул үҫтерә. Өлкәне һөнәр алып эшләп йөрөй, уртансыһы төҙөлөш техникумында белем ала, кесеһе быйыл 5-се класҡа бара. – Ауылдан ситкә китергә теләк булманы. Тормош иптәшем ғаиләлә иң кесеһе булғас, төп йортто ташламаныҡ. Тыуған яғыбыҙ – беҙҙең өсөн иң матуры, – тине әңгәмәсем. Шулай тыуған ерен, кешеләрен яратып эшләгәнгә, йәшәгәнгә лә уңыштарға өлгәшә Гөлнара Шәрифуллина. Ғөмүмән, был бүлексә биш ауылды хеҙмәтләндерә, барлығы туғыҙ почтальон эшләй. Почта бүлексәһе начальнигы Рәйфә Насибуллина үҙе лә 1986 йылдан алып ошонда хеҙмәт итә. Тәүҙә оператор булып эшләһә, 2006 йылдан етәксе вазифаһын башҡара. – Гәзит уҡыусыларыбыҙ, ғәҙәттә, бер үк кешеләр. Араларында матбуғат баҫмаларын көтөп алыусы 97 йәшлек инәй ҙә бар. Беҙ уларҙы юғалтмаҫҡа тырышабыҙ. Үҙҙәренә уңайлы булған ваҡытта почтальондарыбыҙ өйҙәренә барып гәзиткә яҙҙырта, – тине бүлексә етәксеһе. Киләсәктә был тарафта "Башҡортостан" гәзитен уҡыусылар һаны ишәйер, тигән теләк менән хушлаштыҡ почта хеҙмәткәрҙәре менән. Автор фотоһы.