Мәсетле районының Оло Ыҡтамаҡ ауылындағы гимназияла спорт залы ремонтланасаҡ. Эштәр “Мәғариф” милли проектына ярашлы башҡарыла, тип хәбәр итә Мәсетле районы хакимиәте. Ремонт сиктәрендә стеналарҙың буялыуы, иҙәндәрҙең яңыртылыуы, торба үткәргестәрҙең алмашыныуы, вентиляция каналдарының таҙартылыуы, душ кабиналары ҡуйылыуы көтөлә. Эштәрҙе яңы уҡыу йылы башланғанға тиклем тамамларға ниәтләйҙәр. “Уҡыусыларыбыҙ төрлө спорт төрҙәрендә ҙур уңыштарға өлгәшә. Гимназистар командаһы даими рәүештә район буйынса үткән спорт ярыштарында еңеүсе һәм призер була. Мәҫәлән, быйыл беҙҙең волейболсылар ”Мәктәп лигаһы” республика волейбол турниры чемпиондары булды. Спортты үҫтереү өсөн яҡшы шарттар, шул иҫәптән уҡыусылар өсөн уңайлы бина кәрәк. Был яңы еңеүҙәр өсөн бик яҡшы этәргес булыр, тип уйлайым”, – тип үҙ фекере менән уртаҡлашты гимназияның директоры Зөлфиә Әбүбәкерова. Билдәле булыуынса, "Мәғариф" (национальный проект “Образование”) милли проекты Рәсәй Президенты Владимир Путиндың май указы менән булдырылды. Фото: национальныепроекты.рф