Башҡортостан Хөкүмәте Премьер-министры урынбаҫары – ауыл хужалығы министры Илшат Фәзрахманов үҙ сығышында быйыл көтөлгән уңыш тураһында ла һөйләне. – Ҡойма ямғырҙарға ҡарамаҫтан, уңыш мул булмаҡсы. Яҡынса 3,5 миллион тонна иген культуралары йыйып алырға планлаштырабыҙ. Майлы культуралар яҡынса 600 мең тонна булмаҡсы. Шәкәр сөгөдөрө ике миллион тонна булыр тип өмөт итәбеҙ. Быйыл уңыш йыйыу кампанияһы барышында ауыл хужалығы эшсәндәренә 2,806 миллион гектар сәсеү майҙанынан уңыш алырға кәрәк буласаҡ. Шуларҙың 1,634 миллион гектары – иген һәм ҡуҙаҡлылар культураһы. Ҡайһы бер райондарҙа ужым культураларын урыуға төштөләр ҙә инде, - тине ул. Республикала уңыш йыйыу кампанияһы алдынан ауыл хужалығы тармағында эшләүсе белгестәрҙе “Баҫыу көнө”нә йыйып алыу матур йолаға әүерелгән. Зоналарға бүленгән сараларҙа белгестәр тәжрибә уртаҡлаша, ғалимдар алдынғы хужалыҡтарҙың эше менән таныша. Быйыл төп сара 500-ҙән ашыу төрлө тармаҡ вәкилен Нуриман районы баҫыуында йыйҙы. Быйыл ауыл хужалығы тармағына яңы һынауҙар өҫтәлде: яғыулыҡтың хаҡы бермә-бер артты, ауыл хужалығы техникаһы ҡыйбатайҙы, үҫемлектәрҙе һаҡлау саралары ла ике-өс тапҡыр артҡан. Илшат Фәзрахманов билдәләүенсә, гидрометеорологтар быйылғы йәйгә ҡоролоҡ вәғәҙә иткәйне, фараздар аҡланманы. Киреһенсә, уңыш йыйыу осорона ямғырҙар килеүе көтөлә. Шуға бер минутты ла әрәм итмәй, уңышты ваҡытында һәм юғалтыуһыҙ йыйып алыу мөһим. Быйыл баҫыуҙарға 3,9 мең иген урыу комбайны сығасаҡ. Был былтырғы менән сағыштырғанда 140 берәмеккә күберәк. Комбайндарҙың 80-е быйыл һатып алынған.Семинарҙа ҡатнашыусылар өсөн бай программа әҙерләнгән ине: йөҙ берәмек заманса техника, запас частар һәм йыһаздар күргәҙмәһе, үҫемлектәрҙе ҡоротҡостарҙан һаҡлау саралары менән танышырға була ине. Рәсәй ауыл хужалығы үҙәгенең Башҡортостан буйынса үҙәге белгестәре тарафынан быйыл 110 тәжрибә участкаһы һалынған ине. Уларҙа төрлө саралар ҡулланылып, төрлө орлоҡтар сәселгән ине. Һауа торошо, ҡарау һәм башҡа шарттарҙы иҫәпкә алып, сағыштырыу мөмкинлеге менән файҙаланды белгестәр. Әйткәндәй, тәжрибә участкаларында сәселгән ужым бойҙайының алты сорты ла Рәсәй етештереүселәренеке. Киләсәктә республика хужалыҡтары мөмкин тиклем үҙебеҙҙә етештерелгән орлоҡҡа күсәсәк. Автор фотолары.