19 июлдә Республикаға идара итеү үҙәгендә Рәсәй Хөкүмәте Рәйесе урынбаҫары Марат Хөснуллиндың һәм Башҡортостан Башлығы Радий Хәбировтың эшлекле осрашыуы үтте. Көн тәртибендә федераль үҙәктең республика менән үҙ-ара бәйләнеше һорауҙары ҡаралды, төбәк биләмәһендә күләмле проекттарға өҫтәмә ярҙам саралары тураһында һүҙ барҙы. Башҡортостан Башлығы вице-премьер Марат Хөснуллинға төҙөлөш, транспорт үҫешенә ярҙам өсөн рәхмәтен белдерҙе. - Рәсәй Президенты, ил Хөкүмәте башланғысы менән булдырылған программалар һәм проекттар беҙҙең республика үҫешенә ыңғай йоғонто яһай. Башҡортостанда әле иҡтисади хәл тотороҡло, - тине төбәк етәксеһе Радий хәбиров. – Төбәктә торлаҡ һәм юл төҙөлөшө йылдам бара. Былтыр 3,3 миллион квадрат метрҙан ашыу майҙанда торлаҡ төҙөлдө. 2030 йылға беҙ йыл һайын 4 миллион квадрат метр төҙөргә тейеш. Был маҡсатты ла үтәйәсәкбеҙ. Транспорт тармағында республикабыҙ биләмәһендә М-12 федераль трассаһының участкаһын төҙөү проектын тормошҡа ашырабыҙ. Уны 2024 йыл аҙағына тамамлау ниәтләнә, был ваҡиға халыҡтың йәшәү сифатын күтәреүгә булышлыҡ итәсәк. Рәсәй Хөкүмәте Рәйесе урынбаҫары Марат Хөснуллин Башҡортостанда төҙөлөш комплексын юғары баһаланы. - Бөгөн Өфөлә күргәндәрем бик ыңғай тәьҫораттар ҡалдырҙы. Ҡалала йорттарҙың архитектураһы матур. Баш ҡаланың яңы заманса стиле барлыҡҡа килеүе һөйөнөслө. Торлаҡ төҙөлөшө күләме буйынса Башҡортостан алдынғы ун төбәк иҫәбенә инә. Йылдан-йыл был күрһәткес арта. Юл инфраструктураһы үҫеше буйынса ла төбәк “Хәүефһеҙ сифатлы юлдар” милли проектының планын уңышлы үтәй, - тине ул. фото: Башҡортостан Башлығы сайты.