19 июлдә Рәсәй Хөкүмәте Рәйесе урынбаҫары Марат Хөснуллин һәм Башҡортостан Башлығы Радий Хәбиров Көрәш һарайының төҙөлөш майҙанын ҡараны. Был - баш ҡалабыҙҙың 450 йыллығына быйыл асыласаҡ юбилей объекттарҙың береһе. Быйыл көҙ уның базаһында “Рәсәй – спорт державаһы” тигән 12-се халыҡ-ара форум үтәсәк. Шул иҫәптән Рәсәй Президенты ҡарамағындағы физик культура һәм спорт үҫеше буйынса совет та уҙғарыласаҡ. Рәсәй Хөкүмәте вице-премьеры һәм Башҡортостан Башлығы төп залды һәм трибуналарҙы ҡараны, төҙөлөш арышы менән танышты. Бинаның дөйөм майҙаны - 28 мең квадрат метр. Ул үҙенә универсаль залды һәм 3400 тамашасыға иҫәпләнгән амфитеатрҙы индерә. Шулай уҡ биш зал менән спорт көрәше мәктәбе, спортсыларға ҡунаҡхана, конференц-зал, медицина үҙәге, спа-комплекс һәм бассейн инә. Яңы спорт учреждениеһында халыҡ-ара һәм Рәсәй кимәлендәге ярыштар үтәсәк. Подрядсы ойошмаһы вәкиле Дмитрий Дудко билдәләүенсә, төҙөлөш майҙанында, ике сменала 480 белгес эшләй. Әле объект 83 процентҡа әҙер. Бина эргәһендә эшселәр футбол, баскетбол, волейбол, теннис менән шөғөлләнеү өсөн универсаль спорт майҙансыҡтарын ҡора. Ҡала халҡына ял итеү өсөн дә йәмәғәт киңлектәре булдырыла. - Мин бик һоҡланам. Был донъя кимәлендәге объект. Торлаҡ микрорайонында урынлашыуы айырыуса ныҡ һөйөндөрә. Был биләмәлә спорт үҫеше өсөн ул тартыу үҙәгенә әүереләсәк, - тине Марат Хөснуллин. Фото: Башҡортостан Башлығы сайты.