Республика халҡын борсоған мәсьәләләр ҡаралды

Рәсәй Геройы Максим Серафимов исемендәге “Патриот” хәрби-патриотик паркында үткән сарала Башҡортостан Башлығы Радий Хәбиров республиканың Әбйәлил, Архангел, Ауырғазы, Бәләбәй, Бишбүләк, Дүртөйлө, Ейәнсура, Ишембай, Ҡалтасы, Ҡариҙел, Ҡыйғы, Краснокама, Кушнаренко, Тәтешле һәм Шаран райондары ауыл биләмәләре етәкселәре менән осрашты. Төбәк етәксеһе ауыл биләмәләре башлыҡтары менән халыҡты борсоған мәсьәләләрҙе тикшерҙе. Һүҙ биләмәләрҙе үҫтереү һәм ауылдарҙы төҙөкләндереү, автомобиль юлдарын һәм инженер селтәрҙәрен ремонтлау, шулай уҡ социаль проекттарҙы һәм программаларҙы тормошҡа ашырыу хаҡында барҙы. Үҙ сығышында төбәк етәксеһе республиканың идара итеү командаһының төп бурыстарын билдәләне: – Әлбиттә, берлектәге эшебеҙҙең мөһим йүнәлеше – махсус хәрби операцияға ярҙам итеү. Алғы һыҙыҡтағы яҡташтарыбыҙға күрһәткән ярҙамығыҙ өсөн рәхмәт. Яугирҙәребеҙҙең, бигерәк тә һәләк булған хәрбиҙәрҙең ғаиләләре хаҡында ла хәстәрлек күреү мөһим. Уларҙың туғандары һәм яҡындары менән шәхсән осрашырға, килеп тыуған мәсьәләләрҙе тиҙ арала хәл итергә кәрәк. Икенсе бурыс – төбәктең тотороҡло үҫешен, шул иҫәптән ауылда бәләкәй һәм урта предприятиеларҙың эшен тәьмин итеү. – Башҡортостан иҡтисадын үҫтереү өсөн бөтә сараларҙы башҡарабыҙ. Уҙған йыл йомғаҡтары буйынса республикабыҙ сәнәғәт сәйәсәтен тормошҡа ашырыуҙың һөҙөмтәлелеге буйынса Рәсәй рейтингын етәкләне, – тине Радий Хәбиров. Төбәк етәксеһе эске туризмды үҫтереүгә айырыуса иғтибар бүлде. Муниципалитеттар үҫеш нөктәләрен һәм ҡунаҡтарҙы йәлеп итеүҙе, шулай уҡ тейешле сервис инфраструктураһын булдырырға тейеш. Райондарға төрлө тематик саралар ойоштороуға йыл һайын 500-әр мең һум аҡса бүленеүен дә билдәләп үтте. Республика мөһим социаль проекттарҙы һәм программаларҙы тормошҡа ашырыуҙы дауам итәсәк, тине төбәк етәксеһе. Шул уҡ ваҡытта урындарҙа халыҡ менән даими аралашыу һәм уларҙы борсоған темаларҙы хәл итеү мөһим. *** Семинар сиктәрендә Башҡортостан Башлығы ауыл биләмәләрен үҫтереүгә ҡағылышлы һорауҙарға ла яуап бирҙе. Улар иҫәбендә – юлдар төҙөү һәм ремонтлау, социаль объекттарҙы яңыртыу, ҡаты коммуналь ҡалдыҡтарҙы сығарыу, йәмәғәт киңлектәрен төҙөкләндереү. Ауыл советтары вәкилдәре проблемалы юлдарҙы ремонтлау республика программаһына урындағы әһәмиәттәге бер нисә участканы индереү мөмкинлеге менән ҡыҙыҡһынды. – Юлды был программаға индереү өсөн өс шарт бар: трассаның теге йәки был участкаһына ялыуҙары күп булыуы, уның торошон объектив баһалау, шулай уҡ ошо юлды ремонтлау муниципалитет һәм тотош республика өсөн ниндәй иҡтисади һәм социаль эффект биреүе, – тип аңлатты төбәк етәксеһе Радий Хәбиров. – Киләһе йыл ошо программа маҡсаттарына дүрт миллиард һумдан ашыу аҡса йүнәлтергә ниәтләйбеҙ. Башҡортостан Башлығы транспорт инфраструктураһын яңыртыу буйынса бер нисә йөкләмә бирҙе һәм семинар йомғаҡтары буйынса ҡабул ителгән ҡарарҙарҙы артабан тормошҡа ашырыу өсөн рәсмиләштерәсәктәрен һыҙыҡ өҫтөнә алды. Фото: glavarb.ru