Һәр кеше ризыҡ һорап мөрәжәғәт итә ала

Өфө ҡалаһында "Аҙыҡ-түлек" туҡланыу банкының төбәк бүлексәһе офисы (Башҡортостанда беренсе фудшеринг) асылды. Унда "Русь" Банк еды" хәйриә фонды президенты Юлиа Назарованың, "Бәхет биләмәһе" хәйриә фондының попечителдәр советы рәйесе Каринэ Хәбированың, Башҡортостан Хөкүмәте Премьер-министрының беренсе урынбаҫары Урал Килсенбаевтың ҡатнашыуы сараға мәртәбә өҫтәне. Юлиа Давидовнаның һүҙҙәренә ҡарағанда, илебеҙҙә фәҡирлек сигендә йәшәүселәр ҙә юҡ түгел, шул уҡ ваҡытта әллә күпме аҙыҡ-түлек ергә сығарып түгелә. Ташланған ризыҡты миллион тонналар менән иҫәпләргә мөмкин. Ашамлыҡ иҫкермәҫ борон уны тейешле урынға алып еткереү мөһим. Маҡсат – мөмкин тиклем күп мохтаждарҙы ашатыу-эсереү, уларҙы аҙыҡ-түлек йәһәтенән ярҙамдан өҙмәү. Әлбиттә, бындай ҙур эште йылдам ойоштороу зарур, ирекмәндәрҙең тырышлығы – маҡтауға лайыҡ. Рәсәйҙә туҡланыу банкы эшмәкәрлеген киң йәйелдерә бара, әммә һәр төбәктең үҙенең айырым эш ысулы бар. Юлиа Назарова Ырымбур өлкәһендәге Орск ҡалаһын һыу баҫҡанда башҡортостандарҙың теләктәшлек күрһәтеүен бүтәндәргә өлгө итеп ҡуйҙы. Беҙҙәге ҡунаҡсыллыҡҡа юғары баһа бирҙе, уны тотош илебеҙгә таратыу кәрәклеген әйтте. – Рәсәй өсөн дә, үҙ сиратында, Башҡортостан өсөн дә мөһим дә, кәрәкле лә проект был, – тине Каринэ Хәбирова. – Уның тураһында тәүге тапҡыр 18 йыл элек ишеткәйнем. Әйтәйек, ковид осорон ғына алайыҡ. Ул ваҡытта кешегә нимә кәрәк ине – һүҙ ҙә юҡ, эсергә – һыу, ашарға – ризыҡ. Туҡланыу банкын айырым ҡатлам кешеләренә генә тәғәйенләнгән тип уйлаусылар ҙа барҙыр. Юҡ, һис тә улай түгел. Ауыр тормош хәлендә һәр кем ҡалырға мөмкин. Бынан тыш, "миңә ҡатмарлы мәлдә туғандарым ярҙам итә" тип әйтеүселәр ҙә табылыр. Хәҙер иһә ундай төркөмгә ҡарағандарға ҡайҙа мөрәжәғәт итеү өсөн айырым урын бар. Ярҙам һорау бер ҙә оят түгел, шуны дөрөҫ алайыҡ. Каринэ Владимировна һөйләүенсә, "бүлешеү – мөһим" слоганы шул хәтлем отошло һайланған. Һәр кем эште үҙенән башларға тейеш. Башҡортостан Хөкүмәте Премьер-министрының беренсе урынбаҫары Урал Килсенбаев белдереүенсә, мохтаждарҙы аҙыҡ-түлек менән тәьмин итеү – ошо эштең һуңғы һөҙөмтәһе. Улай ғына ла түгел, был тәңгәлдә эште эҙмә-эҙлекле алып барыу мөһим, унда һәр кемдең ҙур хеҙмәте ята. Тейешле урынға ашамлыҡты алып барып еткереүсе ирекмәндәр, аҙыҡ-түлек йыйылмаһын туплаусы уңғандар, ҡаптарға һалыусы тырыштар, ҡыҫҡаһы, эш сылбыр рәүешендә бара. Урал Таһир улы тиккә генә Баймаҡ районының Төркмән ауылын телгә алманы. Ундағы халыҡ һәр яҡлап та ашатыусы ролен үтәгән һыйыр малынан яҙғас, ваҡытында ҙур ярҙам алғандар. Башҡортостан ғаилә, хеҙмәт һәм халыҡты социаль яҡлау министры Ленара Иванова Башҡортостандағы әлеге проект, уны нисек итеп тормошҡа ашырыу тураһында һөйләне. Фото: Илдар Аҡъюлов.