Ғорурланырлыҡ ул үҫтергәндәр

Махсус хәрби операциялағы яугирҙәрҙең яҡындары, ғаиләләре лә иғтибар үҙәгендә. Уларға көндәлек тормошта ярҙам саралары күрһәтелеп тора. Был йәһәттән Бүздәк районда ла миҫалдар күп. Улдары махсус хәрби операцияла батырҙарса һәләк булған Әлфиә менән Тимерйән Ғималетдиновтар яҡташтарының иғтибарынан ситтә ҡалмай. Күптән түгел уларҙың йорттарын ремонтлап биргәндәр. Был эштәр Башҡортостандың социаль маҡсатлы программалар фонды иҫәбенә башҡарылған. Пенсионерҙар өсөн был, әлбиттә, ҙур ярҙам. Эске яҡтан йылытыу системаһын, электр үткәргесте алмаштырғандар, иҙән-түшәмдәр яңыртылған, эске биҙәлеш эштәре башҡарылған. Таҡтанан эшләнгән төкәтмәне лә кирбес менән тышлап ҡуйғандар. Урам яҡлап та өй көпләнгәс, ул тағы ла ҡупшыланып киткән. Улдарының иҫтәлегенә йортҡа мемориаль таҡтаташ ҡуйылыуы ла геройҙың батырлығы тураһында һөйләй. Бынан тыш, Әлфиә апай менән Тимерйән ағайҙы төрлө сараларға саҡырып торалар. – Хөрмәт, иғтибар тоябыҙ. Төрлө экскурсияларға саҡыралар, концерттарға билет бирәләр. Район мәҙәниәт йортона Ғаилә көнөнә арналған байрамда тәбрикләнеләр. Бергә йәшәүебеҙгә лә быйыл 49 йыл була. Район хакимиәтенән дә киләләр, координаторыбыҙ Гөлфиә Ринат ҡыҙы ла хәлебеҙҙе белешеп тора, – тине Ғималетдиновтар. Иленең хәүефһеҙлеге өсөн ғүмерен аямаған, илһөйәр ул үҫтергән атай менән әсәй һис шикһеҙ ихтирамға, иғтибарға лайыҡ. Улдарын юғалтыу йөрәктәрен һыҙлатһа ла, уның менән ғорурлыҡ тойғолары ла сикһеҙ. Ғәзиздәре һәләк булғандан һуң ул Шайморатов, Ҡаһарманлыҡ ордендарына лайыҡ була. Шайморатов орденын Башҡортостан Башлығы Радий Хәбиров өйҙәренә килтереп ата-әсәйгә бирә. Ҡаһарманлыҡ ордены геройҙың ҡатынына тапшырыла. – Улыбыҙ бик тәртипле булып үҫте. Армияға барырға ваҡыт еткәс, Владивостокта сик буйы ғәскәрҙәрендә был бурысын да яуапылылыҡ менән үтәп ҡайтты. Командирынан Рәхмәт хаты ла алдыҡ. Артабан ведомствонан тыш һаҡ хеҙмәтендә эшләп, старшина дәрәжәһенә күтәрелде. Ә 2014 йылдан контракт буйынса хеҙмәткә китте. Махсус хәрби операция башланғас, хеҙмәт юлын унда дауам итте. Батыр ине, иленә биргән антына тоғро булды. Беҙгә лә һәр ваҡыт иғтибарлы ине, ярҙам итергә тырышты. Үҙенең ғаиләһе, балалары өсөн дә өҙөлөп торҙо. Киләсәккә пландары ла ҙур ине, – тип улын йылы тойғолар менән хәтергә алды Тимерйән ағай. Әйткәндәй, Тимерйән Садрислам улы үҙе лә ваҡытында армияла ракета ғәскәрҙәрендә һалдат бурысын үтәгән. Шуға хәрби хеҙмәттең егеттәргә кәрәк булыуына шикләнмәй. – Армиянан ҡурҡмаһындар. Хеҙмәт итмәгән егет егет түгел, сөнки армия уны сыныҡтыра, тормошҡа ҡарашын үҙгәртә. Элек хатта эшкә урынлашҡанда ла иң беренсе “Армияла булдыңмы?” тип һорай торғайнылар бит, – тине ул. Ғаиләһе, яҡындары өсөн генә түгел, тыуған иле өсөн терәк булған ҡаһарман үҫтергән Әлфиә менән Тимерйән Ғималетдиновтар алдында баш эйәбеҙ һәм ҡартлыҡҡа бирешмәй, йәмғиәтебеҙҙең өлгөлө пары булып сәләмәтлектә йәшәүҙәрен теләйбеҙ. Фото: район хакимиәтенән.