Йәйге йәмле көндә тәбиғәт ҡосағына сыҡмайынса булмай, тик ял иткәндә лә һаулыҡ тураһында хәстәрлек күреүҙе һис оноторға ярамай. Торғон һыулы ятҡылыҡтарҙа төрлө паразит һәм бактериялар була, шуға күрә һыу ингәндә был хаҡта оноторға ярамай. Табип Александра Филёва күлдәрҙә, быуаларҙа, һыу һаҡлағыстарҙа хәүеф янаған бактериялар тураһында һөйләне. Тәү сиратта, бындай урындарҙа эсәк таяҡсалары булыуы мөмкин. Улар кешенең ашҡаҙан-эсәк юлына зыян килтерә. Ротовируслы, норовируслы, энтеровируслы инфекциялар, дизентерия, колиэнтерит кеүек сирҙәр киң таралған. “Был ауырыуҙарҙың барыһына ла эс ауыртыуы, ҡоҫоу, хәлһеҙлек һәм организмдың ағыуланыуын күрһәткән башҡа билдәләр хас. Әгәр эсәк инфекцияһы вирус тарафынан барлыҡҡа килгән икән, кешенең, ғәҙәттә, тән температураһы күтәрелә, киҙеү барлыҡҡа килә, башы ауырта. Ошондай билдәләрҙе тойоу менән табипҡа мөрәжәғәт итегеҙ, ул аныҡ анализ ҡуйһын, дауалау тәғәйенләһен. Әгәр бала сирләгән икән, белгес саҡырта һалығыҙ. Юғиһә бәләкәстәр эсәк инфекцияһын ауыр кисерә, ҡоҫоу һәм диарея һөҙөмтәһендә һыуһыҙланыу процесы тиҙерәк бара. Был иһә ауыр хәлгә, хатта үлемгә килтерерүе бар”, – ти табип. Торғон һыуҙа тағы А гепатиты вирусы булырға мөмкин. Әгәр уны кеше йоҡторһа, эсе ауырта, ҡоҫа башлай, тән температураһы 39 – 39,5 градусҡа тиклем күтәрелә. Өҫтәүенә, микроорганизмдар күҙҙең (конъюнктивит) һәм ҡолаҡтың (отит) ялҡынһыныуына килтереүе ихтимал. Йәй һыу ингәндә паразитар инфекцияларҙан һаҡ булыу зарур. Организмға һыу менән микроорганизмдар һәм гельминттарҙың ҡарышлауығы инә. Улар кешенең эсәклегенә эләгә, уның иҫәбенә туҡланып, токсиндар менән ағыулай. Улар йыш ҡына кешегә артыҡ ҙур зарар килтермәһә лә, йәшәү сифатын насарайта. Ошондай инфекциялар иҫәбенә амебиаз, лямблиоз, энтерибиоз ҡарай. Тағы бер паразитар сир төрө бар – церкариоз. Ул теркәлгән осраҡта гельминт кеше тәне аша үтеп инә алмай. Шулай ҙа тирегә эләкһә, тән ҡыҙыл таптар менән ҡаплана, ул бер туҡтауһыҙ ҡысыта, әсетә, сәнсә. Кешелә йүткереү, тән температураһының күтәрелеүе күҙәтелә. Һыу инер алдынан уның таҙалығына иғтибар итегеҙ: ярҙа ҡусҡарҙар күп икән, тимәк, һыу уның ҡаршлауыҡтары менән зарарланған. Паразиттар ҡоштар яратҡан күлдәрҙә лә йыш осрай, шуға күрә һай, йылы күлдәрҙә һыу инмәүегеҙ хәйерле. Ағыулы матдәләр һәм көнкүреш ҡалдыҡтары аллергияға килтерергә мөмкин. Ә һыу ашҡаҙанға эләкһә, ағыуланырға була. Ғәҙәттә, йәй уртаһында күп кенә күлдәрҙә һәм быуаларҙа күренгән йәшелле-күкле ылымыҡтар һыуға кеше өсөн ағыулы матдә бүлеп сығара. Фото: "Башинформ".