Билдәле булыуынса, өлөшләтә мобилизация башланғандың тәүге көндәрендә үк Сибай концерт-театр берекмәһенән бер төркөм артистар махсус хәрби операция биләмәһенә юлланғайны. Әле улар сиратлап ике аҙналыҡ ялға ҡайта. Ошо көндәрҙә "Башҡорт йыры-2020" телевизион йыр конкурсында Гран-при яулаған Әлфир Заманов та тыуған яғына ял итергә ҡайтты. Бөгөн Сибай ҡала хакимиәтендә яугир-йырсыға "Башҡортостандың атҡаҙанған артисы" тигән маҡтаулы исем бирелде. Сарала уның ҡатыны Зинира һәм ата-әсәһе Венера менән Вәфир Замановтар, ағаһы Ғәфүр ҙә ҡатнашты. Әлфир Заманов сығышы менән Баймаҡ районы Күсей ауылынан. Йырлы-моңло ғаиләлә тыуып үҫкән егет бәләкәйҙән йырлай, бигерәк тә халыҡ йырҙарын иҫ киткес оҫта башҡара. Махсус хәрби операцияға юлланғанса, Сибай концерт-театр берекмәһендә эшләй. Йырсы-яугирҙең күкрәген шулай уҡ Рәсәй Федерацияһы Оборона министрлығының "Генерал-майор Александр Александров" наградаһы, "Хәрби батырлығы өсөн” II дәрәжәле миҙалы биҙәй. Әле ул тыуған яғы Күсейҙә ял итә, туғандары менән осраша, дуҫтары менән күрешә. Йәмле Мәмилә буйҙарында тыуған яғының еләктәре менән һыйлана, шифалы үләндәр йыя. Иң мөһиме - Күсемташты яңғыратып күңелендәге хис-тойғоларын бушата, күкрәк киреп йырлап, тыуған яғынан көс туплай. Ҡотлайбыҙ, Әлфир! Артабан да уңыштарың күп булһын, иң мөһиме - тиҙерәк һуғыш бөтөп, иҫән-һау ҡайтып, яратҡан тамашасыларың алдында йырҙарыңды ишетергә яҙһын! Фото: Зинира Заманованың шәхси архивынан.