Реабилитация һәм белем биреү үҙәген асырға ниәтләйҙәр

Кисә Башҡортостан Башлығы Радий Хәбиров ишетеү һәләте буйынса инвалидтар өсөн IX Бөтә Рәсәй йәштәр форумында ҡатнашыусылар менән осрашты. 12-18 июлдә үткән сара лидерлыҡ сифаттарын тәрбиәләүгә, шулай уҡ Бөтә Рәсәй һаңғырауҙар йәмғиәтенең йәштәр менән үҙ-ара эш итеү мәсьәләләрен тикшереүгә йүнәлтелгән. Форум эшендә делегаттарға юғары квалификациялы сурдотәржемәселәр ярҙам итә. Рәсәй Геройы Максим Серафимов исемен йөрөткән “Патриот” хәрби-патриот паркында үткән осрашыуҙа илдең 60-тан ашыу төбәгенән 135 кеше – Бөтә Рәсәй һаңғырауҙар йәмғиәте әүҙемселәре ҡатнашты. Башҡортостан Башлығы форум делегаттары менән аралашты, шулай уҡ ишетеү һәләте буйынса инвалидтарға ярҙам итеүгә индергән өлөшө өсөн республиканың дәүләт наградаларын тапшырҙы. – Быйылғы йыл Башҡортостанда һаулыҡ мөмкинлектәре сикләнгән кешеләргә хәстәрлек күрһәтеүгә арналған. Әммә һеҙ үҙ миҫалдарығыҙҙа мөмкинлектәрегеҙҙең сикһеҙ булыуын күрһәтәһегеҙ. Һеҙ Бөтә Рәсәй һаңғырауҙар йәмғиәте әүҙемселәреһегеҙ, башҡа насар ишеткән һәм ишетмәгән кешеләргә ярҙам итәһегеҙ. Меңдәрсә кешенең яҙмышы һеҙҙең эшегеҙгә бәйле. Башҡортостанда ғына ишетеү һәләте ҡаҡшаған 15 меңдән ашыу кеше йәшәй, – тине Радий Хәбиров. Төбәк етәксеһе ишетеү һәләте буйынса сикләүҙәр менән йәштәрҙе социалләштереүҙең мөһимлеген билдәләне. Һүҙ һөнәри күнекмәләрҙе үҫтереү һәм бындай балаларҙы артабан эшкә урынлаштырыу тураһында бара: – Ике йыл элек беҙ Өфөлә ишетеү һәләте боҙолғандар араһында II “DeafSkills” милли профессиональ оҫталыҡ чемпионаты үткәрҙек. Ярыштарҙа “үҙенсәлекле” йәштәребеҙҙең уңышлы уҡый һәм эшләй алыуын күрҙек. Белем биреү мәсьәләһе – ишетеү һәләте боҙолған кешеләр өсөн иң мөһимдәрҙең береһе. Башҡортостанда ошондай төркөмгә ҡараған кешеләргә белем алыу мөмкинлеге булған 14 колледж эшләй. Һәм беҙ был йүнәлеште үҫтереүҙе дауам итәсәкбеҙ. Республика Башлығы шулай уҡ 2024 йылдың көҙөндә Өфөлә һаулыҡ мөмкинлектәре сикләнгән балалар һәм үҫмерҙәр өсөн ”Салют” республика реабилитация һәм белем биреү үҙәген асырға ниәтләүҙәрен хәбәр итте. Артабан Башҡортостан Башлығы йәштәр форумында ҡатнашыусылар менән аралашты. Улар үҙ сиратында сараны ойоштороуҙың юғары кимәлен һәм республика етәкселегенең һаулыҡ мөмкинлектәре сикләнгән халыҡҡа иғтибарын билдәләне. Фото: glavarb.ru