Машинанан ҡалған тимер өйөмөнән кәүҙәләрҙе сығара инеләр...

Һөҙөмтәлә ғаилә башлығы дауаханаға барғанда, 8 йәшлек ҡыҙҙары ваҡиға урынында һәләк була, әсә кеше һәм 2, 12 йәшлек тағы ике бала ауыр хәлдә... Иҫегеҙгә төшөрәбеҙ, авария Аҡтаныш районында төнгө сәғәт 1-селә теркәлә. Унда “Kia Rio” менән “Man” йөк машинаһы бәрелешә. Татарстан Дәүләт автоинспекцияһы фаразы буйынса, ғаилә башлығы икенсе һыҙатҡа күскән саҡта юлдағы ҡоймаға бәрелә һәм һөҙөмтәлә ҡаршы һыҙатҡа сығып, йөк мәшинаһына төкөлә. Билдәле булыуынса, руль артында Өфөнән Ф. Исмәғилев була. Ул ғаиләһе менән Ҡазанға ял итергә юлланған. Улар менән шулай уҡ икенсе машинала туғандары ла бара. Ф.Исмәғилевтең апаһының ире туғандарының Татарстан ДАИ-һының фаразы менән риза түгеллеген белдерә. Был турала “КП-Ҡазан” хәбәр итә: – Беҙ ике машинала юлланғайныҡ. Флориттар арттараҡ, ә беҙ алда бара инек. Юл буйы бәйләнеш тоттоҡ, аралашып барҙыҡ. Тик бер мәл улар яуап биреүҙән туҡтаны. Берәй хәл булғандыр тип уйлап та өлгөрмәнем, шунда уҡ Флориттың телефонынан билдәһеҙ ир шылтыратып, ҡот осҡос хәл тураһында хәбәр итте, – ти Ринат. Хәбәрҙе алғас та, Хисамовтар кире йүнәлештә юл тота. – Беҙҙең арала яҡынса 10 саҡрым ғына юл ине... Мин үҙ күҙҙәремә ышанманым. 15 минут элек кенә барыһы ла иҫән-һау ине, ә хәҙер машинанан ҡалған тимер өйөмөнән кәүҙәләрҙе сығара инеләр... – тип хәтерләй һәләк булыусыларҙың туғаны. Дәүләт автоинспекцияһының Татарстан буйынса матбуғат хеҙмәте хәбәр итеүенсә, 36 йәшлек водитель хәүефһеҙ тиҙлек һайламауы арҡаһында юлдағы ҡоймаға барып бәрелгән. Ошо һүҙҙәр арҡаһында күптәр водителде руль артында йоҡлап киткән тип фаразлай башлай. – Был дөрөҫ түгел! Флорит – 18 йыллыҡ водитель стажы булған Ғәҙәттән тыш хәлдәр министрлығының элекке хеҙмәткәре. Ул бындай иғтибарһыҙлыҡҡа юл ҡуймаҫ ине. Кәләше аңына килгәс, иренең дөм ҡараңғылыҡ арҡаһында юлды күрмәүен хәбәр итте. Мәрхүмдең кәләше Эльвира Исмәғилева һөйләүенсә, боролошта яҡтылыҡты сағылдырыусы элементтар булмаған, шуның арҡала Флорит күрмәйенсә юлын тура йүнәлештә дауам иткән. Әйткәндәй, быны уларҙың туғаны Ринат үҙе лә күргән булған. – Әлегә Тәфтиш комитеты осраҡ буйынса тикшереү алып бара. Авариянан һуң күп тә үтмәйенсә ошо боролошта яҡтылыҡты сағылдырыусы элементтар ҡуйғандар ҙа инде. Аварияның сәбәбен аңлағандармы икән?! – ти Ринат. Һәләк булыусыларҙан тыш, дауаханала Флориттың ҡатыны Эльвира һәм ике балаһы дауаланыу үтә. – Улар нимә эшләргә белмәйҙәр. Шуныһы билдәле: оҙаҡ һәм ҡыйбатлы дауаланыу, артабан реабилитация көтә, – тип һүҙен йомғаҡланы Исмәғилевтәрҙең туғаны Ринат. Фото: КП-Өфө.