Премьер-министр Андрей Назаров етәкселегендә үткән Башҡортостан Хөкүмәте ултырышында республикала дәүләт аналитик контроль эшен ойоштороу тураһында фекер алышыу барҙы. Андрей Назаров тирә-яҡ мөхит торошоноң халыҡ тормошо сифатына йоғонто яһауына иғтибарҙы йүнәлтеп, уны бысратыу һәм авария осраҡтарын оператив асыҡлау һәм хәл итеү кәрәклеген билдәләне. –Тирә-яҡ мөхиттең төп өлөштәре, ә был һауа, һыу һәм тупраҡ, торошон анализлау өсөн республикала Дәүләт аналитик контроль идаралығы булдырылған. Идаралыҡтың аккредитацияланған лабораторияһы бар, һәм ул һыу объекттары һәм атмосфера һауаһы торошона мониторинг үткәрә, – тип билдәләне Андрей Назаров. Башҡортостан тәбиғәттән файҙаланыу һәм экология министры Нияз Фазылов әйтеүенсә, Дәүләт аналитик контроль идаралығы атмосфера һауаһына мониторинг үткәреүҙе автоматлаштырылған станциялар ярҙамында башҡара, тирә-яҡ мөхитте бысратыу сығанаҡтарын асыҡлай, тикшереүҙәрҙә, авария һәм ғәҙәттән тыш хәлдәрҙә ликвидация эштәрендә ҡатнаша. –Идаралыҡ билдәһеҙ матдәләрҙе асыҡлай ала, был авариялар һәм ғәҙәттән тыш хәлдәрҙе тикшергәндә мөһим. Республикалағы бер лаборатория ла асыҡланған матдәләр исемлеге буйынса идаралыҡ менән ярыша алмай, – тине ведомство етәксеһе. Андрей Назаров дәүләт аналитик контроле ролен көсәйтеү һәм үҫтереү өсөн башҡарма властың профилле органдарына үҙҙәренең программаларын һәм проекттарын тормошҡа ашырғанда тирә-яҡ мөхиттең компоненттарын анализлау өсөн идаралыҡты йәлеп итеү мөмкинлеген ҡарарға ҡушты. Фото: https://pravitelstvorb.ru/news/24502/