Махсус хәрби операция биләмәһендәге бер төркөм яугирҙәр ике аҙналыҡ ялға ҡайтты. Улар араһында оҙаҡ йылдар "Юлдаш” радиоһында эшләгән, әле махсус хәрби операция биләмәһендә булған Бәйтулла Фәтҡуллин да бар. Ул үҙенең яратҡан коллективы менән осрашып та өлгөргән. Бәйтулла Фәтҡуллин 30 йылға яҡын журналистика өлкәһендә эшләй: “Юлдаш” радиоһында “Асыҡ студия”, “Атайсал” тапшырыуҙарын алып барҙа, сәйәси күҙәтеүсе була. Башҡортостандың атҡаҙанған матбуғат һәм киң мәғлүмәт хеҙмәткәре. Былтыр декабрь айында иһә үҙ теләге менән илдең Ҡораллы көстәре сафына баҫып, алғы һыҙыҡҡа юлланырға ҡарар итә. "Мин, журналист булараҡ, 2022 йылдың июнендә Луганскиҙа булғайным. Гуманитар ылау менән барғайныҡ. Шул ваҡытта уҡ ундағы ваҡиғаларҙы күрҙем. Әлбиттә, беҙ тәрән тылда булдыҡ, әммә унда ла һуғыш барғаны күренә ине. Шул ваҡытта уҡ миндә “барырға ине” тигән теләк уянғайны, ләкин хәл ителмәй килде. Һуңғы ваҡытта уйлап йөрөй торғас, шундай ҡарарға килдем һәм уны башта коллективҡа, һуңынан ғаиләмә еткерҙем.