13 июлдә эш сәфәре барышында Башҡортостан Башлығы Радий Хәбиров Учалы районынан махсус хәрби операцияла һәләк булған Рим Закиров, Артур Бирғәлин, Нәжип Ваһапов, Артур Йомағужин, Арыҫлан Кирәев һәм Ринат Фәттәховтың ғаиләләре менән осрашты. Төбәк етәксеһе һәләк булған хәрбиҙәрҙең ата-әсәләренә, ҡатындарына һәм балаларына ҡайғы уртаҡлашыуын белдерҙе һәм генерал Шайморатов орденын тапшырҙы. - Егеттәр ғүмерҙәрен тыуған ил өсөн бирҙе. Уларҙың һәр береһе үҙ бурысын аҙағына тиклем үтәне. Һәммәһе - ысын герой, һәм беҙҙең уртаҡ бурысыбыҙ – улар хаҡында хәтерҙе һаҡлау, – тине Радий Хәбиров. - Һеҙ ысын ир-егеттәр, патриоттар, ватанды һаҡлаусылар тәрбиәләгәнһегеҙ. Улдарығыҙ өсөн ҙур рәхмәт. Беҙҙең төп бурыс – уларҙы иҫтә тотоу, уларҙың хәтерен мәңгеләштереү, даими хәстәрлек күрһәтеү, ата-әсәләрҙең, уларҙың ғаиләләренең һәм балаларының иғтибарын йәлеп итеү. Башҡортостан Башлығы шулай уҡ Республика кардиология үҙәгендә һәләк булғандарҙың ата-әсәләрен һауыҡтырыу һәм реабилитациялау программаһы әҙерләнеүен иҫкә төшөрҙө. – Үҙегеҙҙе һаҡлауығыҙ, һаулығығыҙ тураһында хәстәрлек күреүегеҙ мөһим, күптәргә ейәндәрегеҙҙе тәрбиәләүҙә ярҙам итергә кәрәк, - тип билдәләне Радий Хәбиров. – Һәм, әлбиттә, һәләк булған балаларҙың ғаиләләренә ярҙам итеү - муниципалитет башлыҡтарының төп бурысы. Төбәк етәксеһе һәләк булғандарҙың ата-әсәләре һәм ҡатындарының социаль түләүҙәргә, балаларҙы уҡытыуға һәм дауалауға ҡағылышлы һорауҙарына яуап һәм бер нисә йөкләмә бирҙе. Фото: glavarb.ru