Башҡортостан халҡының финанс мәҙәниәтен формалаштырыу буйынса түңәрәк өҫтәл

12 июлдә Республика менән идара итеү үҙәгендә Башҡортостан Башлығы Радий Хәбиров һәм Рәсәй Дәүләт Думаһының финанс баҙары буйынса комитеты рәйесе Анатолий Аксаков «Граждандарҙың финанс мәҙәниәтен формалаштырыу: перспективалар, талаптар һәм үҫеш нөктәләре» исемле түңәрәк өҫтәл үткәрҙе. Фекер алышыуҙа сенаторҙар, Дәүләт Думаһы һәм Башҡортостандың Дәүләт Йыйылышы – Ҡоролтай депутаттары, республиканың профилле министрлыҡтары һәм ведомстволары етәкселәре, банк берләшмәһе, финанс институттары, страховкалау компаниялары вәкилдәре ҡатнашты. *** Рәсәй Дәүләт Думаһының финанс баҙары буйынса комитеты рәйесе Анатолий Аксаков һайланған теманың көнүҙәклеген билдәләне. – Бер яҡтан, беҙгә халыҡҡа инвестицияларға, ошо юл менән аҡса эшләргә, киләсәккә тупларға мөмкинлек бирергә кәрәк. Икенсе яҡтан, дәүләткә ҙур проекттарҙы тормошҡа ашырыу өсөн «оҙон аҡса» кәрәк. Ә уны, аҡсаларын төрлө оҙайлы финанс инструменттарына һалыу юлы менән, халыҡ бирә ала, – тине Анатолий Аксаков. – Башҡортостан был йәһәттән республика өсөн мөһим проекттарҙы тормошҡа ашырыу өсөн халыҡтың аҡсаһын йәлеп итеүҙе ойоштороу буйынса яҡшы миҫал күрһәтә. Һүҙ, атап әйткәндә, кешеләр, кредит ойошмаларында туплап, торлаҡ һатып алыуға йүнәлтә алған аҡсалар хаҡында бара. Был тәжрибәне бөтә Рәсәй буйлап таратырға кәрәк. Ә бөгөн беҙ ҡануниәт биргән мөмкинлектәрҙе һәм, халыҡтың аҡсаһын инвестиция процестарына йәлеп итеү өсөн, тағы ниҙәр эшләргә кәрәклеген тикшерәсәкбеҙ. Анатолий Аксаков финанс белемен күтәреү һәм мутлашыусыларға ҡаршы көрәш өлкәһендәге закон сығарыу башланғыстары тураһында һөйләне. Депутат шулай уҡ Башҡортостандың иҡтисади уңыштарына айырым туҡталды. – Мин үҙем Башҡортостандан. Атай-әсәйем бында тыуған, үҙем бында мәктәпкә барҙым. Башҡортостанда туғандарым күп, бында йыш ҡайтам. Һәм, әлбиттә, республиканы күҙәтеп барам, күп ыңғай үҙгәрештәр күрәм, – тип һыҙыҡ өҫтөнә алды Анатолий Аксаков. – Башҡортостан бик һөҙөмтәле үҫеш күрһәтә. Мине һеҙҙең Республика менән идара итеү үҙәге хайран ҡалдырҙы. Был донъя кимәлендәге объект. Тыуған еремдең ҡаҙаныштарына шатланам һәм уңыштар теләйем! *** Башҡортостан Башлығы Радий Хәбиров Анатолий Аксаковҡа республика башланғыстарын хуплауы өсөн рәхмәт белдерҙе. – Республика әүҙем үҫешә, эшлекле климат яҡшыра, финанс продукттары һәм мөмкинлектәр арта бара. Ислам банкингы инструменттары барлыҡҡа килә – Башҡортостан был йүнәлештә Рәсәйҙең дүрт пилот төбәгенең береһе булараҡ сығыш яһай, – тине төбәк етәксеһе. – Торлаҡ өсөн аҡса туплау программаһы буйынса уңышлы тәжрибәбеҙ бөтә илгә билдәле. Республика – Милли инвестиция рейтингында өс алдынғы төбәк иҫәбендә. Республика Башлығы Радий Хәбиров билдәләүенсә, төп бурыс – халыҡты һәм инвесторҙарҙы енәйәтселәрҙән һаҡлау. – Һанлаштырыу дәүерендә мутлашыусылар беҙгә һәр яҡтан һөжүм итә. Һәм финанс грамоталылығы, мәҙәниәте бөгөн бик кәрәк. Ҡыҙғанысҡа ҡаршы, беҙҙә антирекордтар күҙәтелә – уҙған аҙнала бер көн эсендә генә республика халҡы мутлашыусыларға 17 миллион һум аҡса күсергән. Енәйәт схемаларына уҡыусыларҙы һәм студенттарҙы ла йәлеп итә башланылар, – тине Башҡортостан Башлығы. – Беҙ хәҙер киберенәйәтселәргә ҡаршы көрәш буйынса программа әҙерләйбеҙ. Хеҙмәт коллективтары менән профилактика эшен көсәйттек. Был эшкә ауыл биләмәләре һәм муниципалитет башлыҡтарын да йәлеп иттек. Кешеләргә мутлашыусыларҙың хәйләләренә нисек эләкмәҫкә кәрәклеген аңлатабыҙ. Төп эш, әлбиттә, иң ышаныусан граждандар, оло йәштәгеләр һәм алыҫ тораҡ пункттарҙа йәшәүселәр менән алып барыла. Төбәк етәксеһе шул уҡ ваҡытта республика халҡының финанс мәҙәниәте үҫеүен һыҙыҡ өҫтөнә алды. Мәҫәлән, һорау алыуҙар күрһәтеүенсә, 2023 йылда халыҡтың 68 процентында уртаса йәки юғары финанс грамоталылығы кимәле күҙәтелгән. – Граждандарҙың финанс институттарына ышанысын һаҡлап ҡалыу мөһим. Бөгөнгө кәңәшмә халыҡтың финанс именлеген тәьмин итеүҙең яңы юлдарын табырға ярҙам итер, тип ышанам, – тине Башҡортостан Башлығы Радий Хәбиров. Мәғлүмәт: https://glavarb.ru/bash/press_serv/novosti/180689.html