Рәсәй Почта көнө билдәләнеүҙең 30 йыллығына арналған сарала Өфө магистраль сортировка үҙәге хеҙмәткәре Нәзирә Зөлҡәрнева ойошманың "Йыл кешеһе" тигән төп наградаһына лайыҡ булған. Бүләкте уға Мәскәүҙә "Рәсәй Почтаһы"ның генераль директоры Михаил Волков тапшырған. Был хаҡта Рәсәй почтаһы Башҡортостан бүлексәһенең матбуғат хеҙмәте хәбәр итте. Нәзирә Нурғәли ҡыҙы ярты быуаттан ашыу ғүмерен почта эшенә бағышлаған. Уның ҡулы аша бер көндә генә 800-ләгән посылка үтә. Бынан тыш, ул бик яҡшы остаз да - 400-ҙән ашыу оператор һәм сорттарға айырыусыны әҙерләгән ул. Улы ла әсәһенең эшен дауам итә һәм 12 йыл инде почтаны алмаштырыу-эшкәртеү цехында эшләй. Ведомство һәм корпоратив наградаларҙы компанияның башҡа алдынғы хеҙмәткәрҙәре лә алған. Мәскәүҙә бөтәһе 90 почта белгесе, шулай уҡ ветерандар һәм почта ирекмәндәре бүләкләнгән. – Почта хеҙмәткәрҙәре – беҙҙең замандың ысын геройҙары. Көн һайын илдең иң алыҫ мөйөштәренә хаттар һәм посылкалар ташыйҙар, йыш ҡына ҡатмарлы шарттарҙа эшләргә тура килә. Уларҙың тырышлығы арҡылы почта клиенттары яҡындары менән бәйләнештә була, мөһим документтар һәм тауарҙарҙы ала. "Рәсәй почтаһы" бөтә илде бәйләй, ул берҙәмлек һәм ышаныслылыҡ символы булып тора. Беҙҙең компанияла шул тиклем күп хәстәрлекле кешеләр эшләгәненә ысын күңелдән шатмын, улар менән барыбыҙ ҙа ғорурлана ала", – тип билдәләй Михаил Волков. Мәғлүмәт сығанағы: Рәсәй почтаһы Башҡортостан бүлексәһенең матбуғат хеҙмәте.