Өфөлә уникаль "Йәшмә бүлмәһе" булған музей асырға ниәтләйҙәр

11 июлдә республика рәссамдары менән осрашыу барышында төбәк Башлығы Радий Хәбиров Башҡортостан сәнғәтенең хазинаһы буласаҡ, уникаль «Йәшмә бүлмәһе»нә эйә музей булдырыу проекты хаҡында һөйләне. Уны Совет майҙаны эргәһендәге төбәктең элекке Контроль-иҫәп палатаһы бинаһында асырға планлаштыралар. Буласаҡ музей экспозицияһы дөйөм майҙаны 2 мең квадрат метр самаһы булған бер нисә залда ойоштороласаҡ. Төп урын «Йәшмә бүлмәһе»нә бүленә, унда мозаика стилендәге художестволы панноларҙа Башҡортостан тарихы һәм мәҙәниәте күрһәтелер, тип күҙаллана. «Ватан хаҡында хеҙмәт» тип аталған икенсе зал Башҡортостан һәм Рәсәйҙең хәрби тарихына арнала. Был залда төрлө тарихи осорҙағы, шул иҫәптән 1812 йылғы Ватан һуғышы, Бөйөк Ватан һуғышы, махсус хәрби операцила ҡатнашыусы республика яугирҙары тураһында әҫәрҙәр тәҡдим ителәсәк. «Башҡортостан хазинаһы» исемле өсөнсө залда уникаль тарихи экспонаттарҙы – «Ирәндек айыуы» алтын аҫылташын, сарматтар алтынын, шулай уҡ Өфө-II ҡаласығында ҡаҙыу эштәре ваҡытында табылған Византия алтынын – урынлаштырырға ниәтләйҙәр. Бынан тыш, бында милли биҙәүестәр, алтын һәм көмөш тәңкәләр коллекцияһы тәҡдим ителеүе күҙаллана. Дүртенсе залда – картиналар галереяһында – даими нигеҙҙә Башҡортостандың Милли музейы һәм Михаил Нестеров исемендәге Башҡорт дәүләт художество музейы коллекцияларынан башҡорт авторҙарының иң яҡшы һынлы сәнғәт, графика һәм скульптура әҫәрҙәрен күрһәтеү планлаштырыла. Бишенсе һәм алтынсы залдар алдынғы федераль музейҙарҙың ваҡытлыса экспозициялары, башҡорт рәссамдары күргәҙмәләре, шулай уҡ төрлө лекциялар, оҫталыҡ дәрестәре һәм презентациялар ойоштороу өсөн бүленә. – «Йәшмә бүлмәһе» тураһында һуңғы ике-өс йыл дауамында уйлайбыҙ. Тәүҙә проектты тормошҡа ашырыуҙы коронавирус пандемияһы, һуңынан санкция баҫымы ҡатмарлаштырҙы. Шуға ҡарамаҫтан, бындай уникаль музейҙы булдырырға ниәтләйбеҙ. Өфөнөң тарихи үҙәгендә Шайморатов генерал һәйкәле урынлашҡан Совет майҙаны, Башҡорт аш-һыуы йорто, музей комплекстарынан торған ҙур туристик кластер формалаша, – тип һыҙыҡ өҫтөнә алды Башҡортостан Башлығы Радий Хәбиров. – Проектты ғәмәлгә ашырыу ваҡыты тураһында һүҙ йөрөткәндә, был биш йылға тиклем дауам итергә мөмкин. Сөнки музейға нигеҙ һалыу эшенә тотонабыҙ икән, ул ысын мәҙәни шедевр булырға тейеш. Рәссамдар берләшмәһе тәҡдим ителгән проектҡа ыңғай баһа бирҙе һәм музей булдырыу идеяһын хупланы. Мәғлүмәт: https://glavarb.ru/bash/press_serv/novosti/180675.html