Башҡортостандың һынлы сәнғәт эшмәкәрҙәре менән осрашыу

11 июлдә Республика йортонда Башҡортостан Башлығы Радий Хәбиров төбәктең һынлы сәнғәт эшмәкәрҙәре менән осрашты. Сарала ҡатнашыусылар араһында Рәсәй Рәссамдар союзының республика бүлексәһе һәм Башҡортостан рәссамдар ижади союзы вәкилдәре лә бар ине. *** Осрашыу башланғанға тиклем төбәк Башлығы «Башҡорт аты» халыҡ-ара башҡорт тоҡомло аттар фестивале, «Китап байрамы» халыҡ-ара китап йәрминкәһе, Рәсәй һәм Белоруссия төбәктәренең X юбилей форумы, шулай уҡ «Арт-ярҙам» һәм «Арт-Концепт» проекттары сиктәрендә республика рәссамдарының пленэрҙарҙа ижад иткән эштәре күргәҙмәһе менән танышты. Республика етәксеһе киләсәктә Евразия күсмә цивилизациялар музейында күсмә халыҡтарҙың тоғро юлдашы булған атҡа арналған картиналар галереяһын булдырыу хаҡындағы пландары менән бүлеште. – Күптән түгел был музейҙың визит үҙәге асылды, картиналарҙың бер өлөшөн унда урынлаштырырға йыйынабыҙ, – тине Радий Хәбиров. – Профилле ведомстволар рәссамдарыбыҙға ҙур заказ менән мөрәжәғәт итәсәк, һәм шул рәүешле галереяға әкренләп нигеҙ һалына башлай. Был, һис шикһеҙ, музейҙы байытыр һәм Башҡортостандың һынлы сәнғәтен үҫтереүгә өҫтәмә стимул бирер. *** Осрашыуҙы асып, Башҡортостан Башлығы Радий Хәбиров республика рәссамдарына ижадтары өсөн рәхмәт белдерҙе, шул иҫәптән эштәренең заманға ауаздаш булыуын билдәләне. – Һынлы сәнғәт – кешенең рухи тормошоноң сағыу өлөшөнөң береһе. Ул эстетик ҡәнәғәтлек бирә, уйланырға мәжбүр итә, төрлө тойғолар уята. Бөгөн рәссамдар беҙ ҡабул иткән ҡарарҙарға ла, эштәребеҙгә лә үҙ фекерҙәрен белдерә. Һеҙгә бының өсөн рәхмәт, – тине төбәк етәксеһе. – Барығыҙҙы ла күреүемә шатмын, һеҙҙең ҡарашығыҙ бик мөһим, сөнки йәмғиәттә барған рухи, әхлаҡи процестарҙы тәрәнерәк һәм нескәрәк тояһығыҙ. *** Башҡортостанда буласаҡ һынлы сәнғәт вәкилдәрен әҙерләү өсөн ныҡлы инфраструктура булдырылды, тип билдәләне республика Башлығы. Төбәктә 82 балалар сәнғәт мәктәбе, өс профилле колледж эшләй, шулай уҡ Заһир Исмәғилев исемендәге Өфө дәүләт сәнғәт институтында ошо йүнәлештә белгестәр әҙерләнә. «Мәҙәниәт» милли проекты сиктәрендә 2020 йылдан художестволы әҙерлек алып барған белем биреү учреждениеларын йыһазландырыуға 200 миллион һумға яҡын аҡса йүнәлтелгән, биш балалар сәнғәт мәктәбе ремонтланған. 2024 йылда Яңауыл районының балалар сәнғәт мәктәбендә капиталь ремонт башҡарыла. Башҡортостан – йыл һайын музей фондтарына заман рәссамдарының картиналарын һатып алыу тәжрибәһе һаҡланған бер нисә төбәктең береһе. Республикала был картиналар менән Михаил Нестеров исемендәге Башҡорт дәүләт художество музейы фонды тулыландырыла. Мәләүез районында Воскресенск картиналар галереяһын ремонтлау буйынса проект-смета документацияһы әҙерләнгән. Экспертизанан һуң төҙөүселәр ремонт-реставрация эштәрен башларға ниәтләй. – Сәнғәт тә Тыуған ил һағында торорға тейеш. Беҙҙең өсөн иң мөһиме – махсус хәрби операцияға ярҙам итеү. Күптән түгел хәрби-патриотик әҫәрҙәр ижад итеүгә конкурс үткәреү тураһындағы указға ҡул ҡуйҙым, – тине Башҡортостан Башлығы. – Асылда, был беҙҙең әҙәби, музыкаль әҫәрҙәргә, патриотик тематикаға һынлы сәнғәт әҫәрҙәренә дәүләт заказы. Уларҙа шул иҫәптән махсус хәрби операцияла ҡатнашыусыларҙың батырлыҡтары сағылыш табырға тейеш. Был бик мөһим. *** Осрашыуҙа ҡатнашыусылар Башҡортостан Башлығына уларҙың ижади башланғыстарын хуплауы өсөн рәхмәт әйтте һәм осрашыуҙың мөһимлеген билдәләне. – Был һынлы сәнғәт өлкәһендәге ғәйәт ҙур ваҡиға. Республика етәксеһе тәүге тапҡыр алдынғы рәссамдарҙы түңәрәк өҫтәл артына йыя, – тине Башҡортостан рәссамдарының Ижади союзы рәйесе Владислав Пегов. – Беҙ һеҙҙең һынлы сәнғәт өлкәһен бик ныҡ хәстәрләүегеҙҙе күрәбеҙ. Һәм һеҙ башҡарған эштәр беҙҙең йөрәктәрҙә үҙ урынын таба. Үҙ ижадында патриотик темаларға мөрәжәғәт итеүсе рәссам Александр Скорняков Башҡортостан Башлығына Украина прокуратураһы тарафынан ситтән тороп тағылған ғәйепләүгә ҡарата үҙ фекерен белдерҙе. – Дуҫтарыбыҙ һәм дошмандарыбыҙ беҙҙең хаҡта эштәр, ҡылыҡтар буйынса фекер йөрөтә. Дошмандың республикабыҙ етәксеһен шулай баһалауы уның барыһын да дөрөҫ эшләүе тураһында һөйләй. Дошман тарафынан бирелгән бындай баһа күпте аңлата. Тимәк, башҡарылған эштәр байтаҡ. Һәм беҙ һеҙҙең менән, бер командала, – тип һыҙыҡ өҫтөнә алды Александр Скорняков – Махсус хәрби операция биләмәһендәге егеттәребеҙ менән аралаштым. Улар Башҡортостан Башлығын атайҙары кеүек яҡын күрә, рәхмәт белдерә, республика етәкселеге яғынан күрелгән ҙур хәстәрлек тураһында һөйләй. Осрашыуҙа рәссамдарҙың ижади союздары эшмәкәрлеге һәм эш барышында тыуған мәсьәләләр тикшерелде. Мәҫәлән, рәссамдарға күргәҙмә майҙансыҡтары етмәй, шул иҫәптән төбәк-ара һәм башҡа күләмле экспозициялар үткәреү өсөн дә. Рәсәй Рәссамдар союзының төбәк бүлексәһе рәйесе Хәтип Фазылов билдәләүенсә, ғәмәлдәге майҙандар республика авторҙарының барлыҡ мөмкинлектәр палитраһын тулы кимәлдә күрһәтеү өсөн етерлек түгел. Республика төрлө майҙансыҡтарҙа сығыш яһау мөмкинлеген булдыра, тип билдәләне Башҡортостан Башлығы. Киләсәктә галереялар өсөн «Йәшмә бүлмәһе» булдырыласаҡ музейҙа, шулай уҡ бөгөн проектлау этабында булған Фән һәм мәҙәниәт һарайында урын ҡараласаҡ. Рәссамдар 2024 йылда Өфөлә асыласаҡ Көрәш һарайын да үҙҙәре өсөн уңайлы майҙансыҡ тип атаны. Октябрь революцияһы урамында ҙур булмаған административ-музей комплексы асыу буйынса ла фекерҙәр бар. Радий Хәбиров шулай уҡ рәссамдарға ижади башланғыстарын тормошҡа ашырыу өсөн республика тарафынан күрһәтелгән грант ярҙамын әүҙемерәк файҙаланырға тәҡдим итте. Фекер алышыуҙың мөһим өлөшө темаһы кадрҙар әҙерләүгә бағышланды. Заһир Исмәғилев исемендәге Өфө дәүләт сәнғәт институтының һынлы сәнғәт факультеты деканы, профессор Әмир Мәзитов һәләтле йәштәргә ярҙам итеү тураһында һөйләне. Шул уҡ ваҡытта ул, ижади юғары уҡыу йортонда кадрҙарҙы әҙерләү туҡтатылыу менән бәйле, республикала сәнғәт белгестәренә ихтыяж барлығын билдәләне. Башҡортостан Башлығы был мәсьәләне Рәсәй Мәҙәниәт министрлығы менән хәл итергә ҡушты. Осрашыуҙа Башҡортостандың һынлы сәнғәтен популярлаштырыуҙың мөһимлеген һыҙыҡ өҫтөнә алынды. Республика етәксеһе Башҡортостан юлдаш телевидениеһында Өфөлә барған күргәҙмәләрҙе даими рәүештә анонсларға тәҡдим итте. Осрашыу аҙағында Башҡортостан Башлығы рәссамдарға дәүләт наградаларын тапшырҙы. – Осрашыу өсөн, тәҡдимдәрегеҙ өсөн рәхмәт. Еткергән һәр фекерегеҙ өсөн рәхмәтлебеҙ. Шуны һыҙыҡ өҫтөнә алам: беҙ килешелгәндәрҙең барыһын да мотлаҡ үтәйәсәкбеҙ, – тип йомғаҡ яһаны төбәк етәксеһе Радий Хәбиров. – Йылына бер тапҡыр осрашып торорға тәҡдим итәм. Киләһе осрашыу һеҙҙең майҙансыҡтарҙың береһендә булһын. Ижади уңыштар теләйем! Ижад итегеҙ, шедеврҙар тыуҙырығыҙ! Мәғлүмәт: https://glavarb.ru/bash/press_serv/novosti/180674.html